الحب الأول

قالوا ده وهم
وقالوا ده هم
مابيتلم
تفتكره تمللي بالغم
ويجيلك دايماً في الحلم
وتلاقي نفسك تتندم
وجراحك فعلاً تتألم
ولا عمر شعورك يتبدل
أو يتحول
ودي قصة الحب الأول
...........................
طب بأمارة أيه كان حب
مابنعرفش
طب ليه عايش جوه القلب
ليه مافهمش
يمكن ذكرى
ويمكن فكرة
بتخلينا بقينا كيان
واحنا يدوبك
نشئ ونكرة
بندور على دور إنسان
....................
يمكن رحلة بحث جميلة
بندور فيها على ذاتنا
الراجل فيها يلقى رجولته
والست تلاقي أنوثتها
يمكن فعلاً هو حقيقة
عشناها وكان ليها ميعادها
وكبرنا واختلفت صورته
وحياتنا اختلفت حقيقتها
يمكن حق ويمكن باطل
لكن فعلاً واقع حاصل
ان قلوبنا يصيبها الحب
واحنا يادوبك بنقوم هُب
.......................
كان صادق فعلاً في مشاعره
وفي أول حب اختار جارته
عارف عنها كل طباعها
واخلاقها مـ العملة الصعبة
هي كمان كات ميتة فيه
واتحقق حلمه وأمانيه
واجوزها وكان متهني
تقوله حياتي.. يقولها عمري
يوم ورا يوم
فاقوا مـ النوم
واكتشفوا أيه هو الحب
وإن حياتهم وهم وكدب
طب بامارة أيه كان حب؟
وبسبب أيه دق القلب
لأول حب؟
.............................
لسة سؤالي مش لاقي إجابة
قولي بصدق قولي بجد
هو حقيقي فعلاً حب
ولا خداع من نبض القلب
ولا مراهقة ولا خيابة
مش حافتن سرك لحد
ولا حافضح قلب اللي حب
هو ده حُب؟؟
صدقني من غير دوران
راح تفضل تايه حيران
فالإنسان هو الإنسان
......................