آهات من القدس

سنين.. وجرحـــك يوجعنى
واصــرخ ولا حـــد سامعنى
وهواكى يا فلسطـين جاينى
جايب معاه م القــدس آهات

آهة رضيع عــلى صدر أمه
شـايل ما بين لفــّته هــمّـُه
مسكين ..لا يعرف إيه إسمُه
و لا لسَّه داق طعم البَسمات
و آه
لِزهــــره فى عِـــــز شبابها
خــايــفه تفوت عتـــبة بابها
و إسرائيل طالقـــه ديابـــها
تنهش وتِعتِدى ع الحُرمات
و آه ..
صرخــة جـدع شايل قََـَدَرُه
على كف .. والتانى لحَجَرُه
و الموت صـديق و بيِنتظرُه
و نبلتُــه .. بتكتـب بطُـولات
وآه ..
مــن أُم .. صرخِتها بحُـرقَه
وتعيش تموت ماهى مش فارقه
بيتها .. خَدوه نهب وسِرقه
و زتونها شجرُه جف ومات
و آه ..
من أب ماشى وإبنُه مـــعاه
قابله رُصاص الغَــدر رماه
حاوِل بصــِدرُه يحمى ضناه
وف لحظه عُمر الاتنين فَات
و آه ..
لشــيخ بِسبـحه و سِـجـّـَاده
ســـاجد لــربُّه.. فى عــباده
على راسُـــه واقفين جلاده
بدبّابات وســلاح وِدانـــات

و آه بِـتـبعـتـهـا كنــيــســــه
بِتقول ل "جرجس" ول "وِيصا"
أجــراسى م الحزنِ حبِيـسه
ما بقتش أَسـمع لهـا دقـات

و آه جرِيحــه منِ الأقــصى
بتقول لى إِوعى ف يوم تِنسَى
الـدنيا ســامعـانى و بـصّــه
و راضـيه حــقـى برّه يبات

و آه .. و آه .. و آه

دبـحتــنى يا قـُدس آهـاتــك
ولا حــد فينا ف يوم غاتــك
فين العرب؟.. فين اخواتك؟
بيدافعوا عنِّك بالشّعارات!!

لاعاد وفا ولا عاد إخلاص
وطن يضيع وحقوق تنداس
وفتح بتحارب فى حماس!!!
بقت كراسى الحُكم غايات !!!

إصحــوا و فــوقوا يا بشر
دى "القدس" فى عِز الخطر
هاتقولوا إيه بُكره ل"عمر"
مفتاحها ضاع واحنا ف سبات؟

هاتقولوا ل"الأيّوبى "إيه
بَعـدك .. رضينـا الذُّل ليه؟
سبنا فلسطـين .. بتقـاسيه
علشان زمان المجد فات !

وفيـن تِـــودّوا وشّـكــــــم
يـوم الــســؤال مـن ربّـكم
فـرّطـتوا ليـه فى أرضــكم
ورضـيـتوا مـنها بالفـُتـات

فـين مـجـدِكم بيـن الأمـم
فـين العــزيـمه والــشَّمَـم
فــين السّواعـد والهـِمـم؟
تِمسح عن "القدس" الآهات
تِمسح عن "القدس" الآهات

الله عليك وعلى اهاتك

ايها القدير محمدالبسيونى

رائعه من روائعك

والتى تمس القلوب قبل وجعها

دمت بكل جمال وروعه وفن وابداع

دمت بكل حب