علاوة يوليو ولعبة التلات ورقات

اصدقاءنا... لم يعد خافيا على احد اللعبه المكشوفه التى تلعبها الست رشيده حكومتنا السعيده

اطال الله بقائها وأمد الله فى عمرها هاااااااى هيئ فى يوليو من كل عام لتلهف ما فى جيوب

الغلابه بحجة انها تمنحهم علاوه 10% للموظفين .. فالحقيقه ايها الاصدقاء ان الشعب هو

الذى يعطى علاوه للست رشيده حكومتنا السعيده اطال الله بقائها وامد الله فى عمرها هااااااى

هيئ كى تعيش فى رفاهية اكتر وبذخ اكتر وبحبحه اكتر ونغنغه اكتر ويركبوا احدث العربيات

ويجيبوا البودى جاردات هم والجماعه التانيين اللى انا مش عارف لهم اى شغله ولا مشغله فى

الدنيا غير انهم بيقبضوا فلوس وبس ويقعدوا كل شويه يجعجعوا فى التلفزيون ويضيعوا مننا

مننا التمثيليات اللى التلفزيون بيعملها عشان لعبة التلات ورقات تكمل فالتلفزيون برضو له دور

وهو انه يلهيك فى تمثيليه عبيطه او فى برنامج اهبل مالوش لزمه واهو كله بيلعب على

الغلابه وكل واحد فى الحكومه بيعمل له سبوبه..شوفوا الكلام حياخدنا ونسيت اقول لكم انا

اقصد مين على الجماعه اللى لا ليهم شغله ولا مشغله الا المسخره والنأوره والضحك على

عامة الشعب بتمثيليات مدروسه ومكشوفه والشعب كله عارفها الجماعه دول هم اعضاء

مجلس الشعب ومجلس الشورى فلا دول اعضاء مجلس شعب ولا ده مجلس شعب ده ممكن

نسميه مجلس انس وفرفشه ومجلس الشورى اللى مالهش اى شورى غير تتأييد الست رشيده

حكومتنا السعيده اطال الله بقائها وامد الله فى عمرها هاااااااى هيئ ومباركه خطواتها المجيده

المهم اشرح لكم لعبة التلات ورقات بسهوله وبساطه الحكومه اعطت الموظفين علاوه 10%

فى العام الماضى لم تزد عن حوالى 35 جنيه لأتخن موظف حكومى بقاله فى الحكومه حوالى 33

سنه والموظفين اللى فى الدوله عددهم كله حوالى 10 مليون مع البعزقه والبحبحه فى الرقم لانى

عارف انهم حوالى 7 او 8 مليون لكن احنا بما اننا ايدينا فرطه وبنتكلم من وسع و بما اننا فقر

ومش لاقيين ناكل انما فنجرية بُقْ وخلاص نخليهم 10 مليون وخلاص المهم الست رشيده

حكومتنا السعيده اطال الله بقائها وامد الله فى عمرها هااااااى هيئ اعطت العشره مليون موظف

10% ثم رفعت البنزين 30% فكأنها قد اعطت 10% لعشره مليون واخذت 30% من

سبعين مليون فالبنزين يا اخوانى يدخل فى كل شيئ يمس حياة الناس فالسيارات التى تستعمل

البنزين تنقل الخضار والدقيق الذى يصنع منه العيش ولن نقول الفاكهه لان الفاكهه بالنسبه

لامثالنا من معدومى الدخل هى نوع من التبذير وان المبذرين كانوا اخوان الشياطين والحمد لله

فنحن اجباريا لسنا من اخوان الشياطين بفضل الست رشيده حكومتنا السعيده اطال الله بقائها

وامد الله فى عمرها هااااااى هيئ كذلك لن اتكلم عن الطيور والفراخ اللى الحكومه لمتها من

السوق ساعة ازمة انفولوانزا الطيور بحجة انها خايفه على صحة الغلابه وانا مستعد احلف

على الختمه المجيده انها بتتمنى موت الغلابه عشان تريح دماغها من زنهم ووجع الدماغ اللى

عاملينه للحكومه كل شويه اقول انها لمت الفراخ بتراب الفلوس من المزارع اللى اتخرب بيت

اصحابها بعد حظر تداول الطيور عشان تبيعهالنا بعد كده الطاق طاقين وتلاته واربعه ومليون

وطبعا مش حتكلم عن اللحمه لان اللحمه اصبحت عند الغلابه رجز من عمل الشيطان ومن

يحلم باللحمه وهو نائم فهو جُنُبْ وعليه الغُسْل ومن ينطق اسمها سرا أو جهارا فقد خرج من

المله وعليه الغُسْلْ والنطق بالشهادتين وكفاره وهى الحرمان من الخبز والملح عامين

متتابعين بدون توقف وإلا فليبدأ من جديد شفتم بقى يا اخوانى لعبة التلات ورقات اللى بتلعبها

الست رشيده اطال الله بقائها وامد الله فى عمرها هااااااى هيئ وفتح عينك تاكل ملبن وفتح

ملبن تاكل عينك...

وبص شوف فين السنيوره

هههههههههههههههههههههههههه
والله صدقت يا أخى يحيى
فى كل ما قلته أنت تملك روح السخرية والنقد اللاذع
وهذا اكتشاف جديد بالنسبة لى
ورائع لو استخدمت هذا الاسلوب فى كتابة أزجال
تعالج قضايانا
مودتى
لنبل حرفك
أخوك
عاطف
geek