شحات احلام

شحات احلام


س/ لو لسه عينيك
مشتاقه تشوف الحلم .. رتوش
تقدر توصفلى يا صاحبى
طريق الحب منين ؟؟؟
ج/ فى اشاره حلم
وتخش يمين .. تطلع على طول
على ناصيه خوف
وهناك هاتشوف
القلب .. ب يرقص ع الكورنيش .
والفرح يعيش زى الشحات
مستنى اللقمه اللى ب يرميها الحزن هناك
يجرى يسقّيها ف مر الضحكه
اللى ب تتشوه م الاحزان
مليون إنسان
وف نفس الثانيه يقولوا (( أمين ))
بعد اما ب يدعى الكل عليك انك تتهان
واتنين تانين
ب يقولوا بلاش
خلوه متصان
وكفايه عليه يفضل برواز
محبوس ف حيطان
وتلاته كمان
ب يقوالوا عليك انك
نخاس
ب تبيع الفكره الحلم الحب
لكل الناس
معذوره الناس
ما دقتش ازاى الليل ب يعدى على الحيران
ولا عرفت طعم الميه اللى ما بتبلش ريق عطشان
ولا شرخ ف زور م اللقمه اللى ب ترفضها المعده كتير
بعد ما تتجاب من مد الايد
علشان تتغمس ف الاحسان
وانا مش خيّال
انا سايس خيل
ونجوم الليل
عكاز النور اللى يوصلّنى لحد البيت
وعشايا يادوب
بصلايه و راقده ف نص رغيف
وسريرى رصيف
وغطايا مفيش
واياك تسألنى
ازاى راح انام وايدين البرد ما تلسعنيش ؟
شايف ف عينيك
نظرات ب تقول ان انا
معتوه
او كان جاى من عالم تانى
مالوهش وجود
انا توب انسان
دايما محتاج الجزء اياه
تقريبا تاه
او جايز لما ف قلبى قتلت الكره
قتلته معاه
وبلاش تسألنى قتلته ازاى؟
وادينى ب اعيش
محبوس ورا شيش .. مشتاق القاه
أحلام لله
وكفايه عليه
ب أنى رضيت افضل عايش
محبوس جواه

الجميل والحبيب

عمرو شاهين

رائعة من رائعاتك التي

عودتنا عليها

تقبل مروري المتواضع

أخوك

عمرو زيتون