بالظبط كده

كالعاده
ومكنش مسـدّق
إن الليله دي خلصت كده
ونام وقام
وكل شئ مطرحه
لا جرح كان ولا خربشه
دي إيده ودي رجله
ودي عنيه اللي شايفه الدنيا
الدنيا اللي دخلها عريان وحافي
وهـ يطلع منها ..
دي أوضته القديمه ف بيتهم القديم
ودول شوية هم قديم
بيغيب ويلح عليه
ف يسيب له البيت والشارع
ويروح ع القهوه
القهوه اللي خدت مننا كتير
بس مانسيتناش
وهيه بيتوزع فناجين الصبر
تدينا أكتر
ده مكتبه ودي أوراقه
ودي آخر جمله ف قصيده ناقصه
القصيده اللي كان نفسه حد يسمعها
بنفس مشاعره وأحاسيسه
ويتغزّل ..
ف البنت اللي حطت راسها علي كتافه
ونامت لحد الصبح
بالظبط كده
هيه دي وهمه دول
وهو ده الواد اللي بتحوم حواليه
كوابيس كل ليله
ومبتقدرش ..
تسقط من عينه دمعه
أو تزرع ف قلبه لحظة ضعف
مايحسش فيها بطعم الحياه
وإنه لازم يعيش
ف تسيبه ..
كالعاده يعني