بقيت شاعر ... أحمد سعيد موسى

كنت بقول علآ نفسي
أنا شاعر
وبَمشي بشعري جوه الليل
ولو واعِر
بنات حوّا قروا شعري
فدابوا فْ لحظه قدامي
وكان همي أقوم واجري
واسابق حتى أحلامي
كتير.. قالولي عاشقينك
وجوّه القلب شايلينك
ودنيانا معاك دِ خضار
لإني الشاعر الملهم
لإني ببهرَج الأفكار
لإن العشق محتاجني
أقول أشعار...
شفوني الحلم قدامهم
شفوني الفارس المغوار
أصارع بالعيون غيري
يموت فِ نهاية المشوار
**************
لكنّي ف لحظه قدامك
ضعفت وكبريائي انهار
لمحت عنيكي من نظره
لقيت القلب قايد نار
*******
نسيت سلمى ولياليها
وليلى وكل أمانيها
وزينب لما بعنيا
لمحت الحب فِ عنيها
نسيت ناديه وضحكتها
وساره بكل رقّتها
وحتى شيْرين وبرَئتها
وسلوى لما تحكيلي
وسابق صوتها دمعتها
ومروه كات بتتمنى
وزهره تقولّي هستنى
لمَحْتِك إنتِ فنسيتها
نسيت هاله ورباب وسناء
نسيت هاجر نسيت أسماء
نسيت بسمه اللي حبتني
وسوسن لما عشقتني
نسيت لينا وأمل وصفاء
ورندا وفيفي حتى وفاء
نسيت عايده نسيت تسنيم
نسيت ورده وسحر ورنيم
وفاتن آه ومنى وياسمين
وعزه ومي حتى حنين
.....وناس تانيين...
وعشاقي كتير حلوين
…………………
وعمر القلب يوم مفتحته
لسواكي
بقيت عايش عشان بحلم
برؤياكي
وغصب عني شفت عنيا
عشقاكي
واغير عليكي من نفسك
وبهواكي
وحتى من المرايه بغير
لإن قزازها يهواكي
…………………
جمال الدنيا شاف حسنك
سجد لله
وقال ضيّّك بمعني الكلمه
يعني حياه
وصوتك حتى فِ سكوتك
يداوي الآه
………………….
بقيت شاعر بِحُبك آه
لكن مجنون
وبكتب فيكي ديواني
رقم مليون
وبحلف إنّي هوفيلك
وعمري مَ اخون
**************
أنا لسا ف بحر الحب
مش عارف
أصول العوم
بشوف الدنيا ف بعادك
ضباب وغيوم
و"احبك" بآجي أقولهالك
بتلصق منّّي
فِ البلعوم
و ضحكة عينك الصافيه
تداويلي جراح وهموم
*
*
بحبك يا حياة قلبي ؟
***
**
*
ولا أكونش انا
موهوم ؟؟