خـفيــف قوي

خفيف قوي
وبيتحرك بشكل مش متعوّد عليه
ومفيش حاجه بتمنعه
كل الحاجات التقيله إتخلص منها
وخصوصا قلبه المليان
ومعبي هموم
دلوقت بس يقدر يطير
ومايمشيش ع الأرض اللي ياما
نغّصت عليه حياته
وعلي قد مازرع فيها ..
لا برتقانها مد إيديه وقطف
ولا عنبها ضلل يوم علي شباكه
دلوقت بس يقدر يسافر لأي مكان
ويرجع بالزمن حبتين ورا
ويموت ف العسليه
والبطاطا
وهو مشبك ف ديل جلابية أبوه
ومكنش لسه الطريق إتملا حفر
ومكنش لسه فيه حاجه توجع
ومالهاش دوا
دلوقت بس يقدر يحقق أحلامه البسيطه ..
من غير مايدخل ف حروب
ويقع كام قتيل منهم
ويتجوز البنت اللي كان نفسه فيها
ويكتب قصيده جديده
يضرب بيها الحزن علي قفاه
ويقوله روّح ( أمك ف العش ولا طارت )
دلوقت بس يقدر يقول أنا كنت عايش
ومش مهم بقي لو حد صحّاه
ولسه الأيام اللي متشعبطه ف رجليه
ومتقلاه
ولسه بيتحرك بالشكل اللي متعوّد عليه
..