رد على المهاجر القديم!!!

رد على المهاجر القديم!!!
محمد بكرى
-----------------

متشكر جدا يا بكري يا صاحبي ..
لكن بر ضه مقلتش ليا .. جايلي أمتي ؟

جايز خالص تطرح بكره ..
ولغاية بكره .. أنا برضه عليها مش بأقدر !

يا بكري أخـبـي عليك ولا قـلبك شايف !
الأرض هي المهاجرة .. والناس عايشة فمراكب ..
يعني برضه سستم .. والكل فيها دايخ ..
قلت أنّقصهم واحد .. ولا أنت ليك رأي تاني ؟

من أمتي كنت قائد السرب .. وأنت جوه الطيران !
يا بكري .. المهاجر أصله مسافر .. مش محتاج طيران

ده نص طابور الستينات .. والهرم لسه فمكانه ..
لا النيل نشف .. ولا الوجع وقف !!
وفاكرني أنا اللي بعت المفتاح ؟

يا بكري ما أنت وزيي وعارف ..
هـوا الرصاص جميل ! خلا صدورنا حديد ..
لكن يا أخي .. نفسي مرة أعيش إنسان ... يخافوا عليه بصحيح !

وبدل مالدولار بخمسة .. ماندخل الكواليس !
يمكن يا أخي تظبط .. ونرجع للمحاريس !
ساعتها برضه الهرم مستني ..
والصحبة، هي هي .. بتشم فالأحاسيس !

متشكر يا بكري يا صاحبي ..
لكن بر ضه مقلتش ليا .. جايلي أمتي ؟

يا بكري .. أمريكا .. عمرها ما كانت جنة ولا ملعب الشياطين !
ما أنت عارف .. عندنا منه واكتر ..
بس إحنا اللي بنام واقفين !
إمال لو مش محامي ..
وعارف اللي بيدي بالشمال وياخد باليمين ؟
تقلي لسه اقعد .. ومستني يجد جديد ؟؟

يا أبو ملك .. ملك ظهرت خلاص ..
الأزمة في الباقيين !
باحاول أنقذ حمادة .. وأخواته اللي مستنين!
عارف لو راحو .. هيرتاحو .. ومش بعيد يكونوا هايليين !

الفرق فالسستم .. وماله ، ماحنا برضه عندك متسستمين !
يا خويا جرب وقول الحق .. ساعتها تعرف أنت عايش مع مين!
لو قريبه صول .. ضمنت الحشيش ! .. وفالسجن تلاقي كتير مظاليم ..
ولو معرفته اعلي – وأنت طالع – خير ربنا .. وبيزيد ..
يمكن تخابر ولا فتنة ويمكن فضيحة .. وبعدها البراءة .. يخسارة الشاب الجميل!

يا عم بكرى .. أنت تعبت من العد .. وأنا من التخمين !
مين اللي عدي .. واللي دوره مستني بشوية الملايين ؟
شوية يقولك سيولة ، وحبة أزمة اقتصاد .. يعنى هي البورصة فاقت من غزوة الأصحاب ؟

دي إحصائيات يا صاحبي .. وحسابات لعبة كبار ..
زيك ملايين مستني .. وأنا اللي في المضمار ..

سباق عنيف يا بكرى .. والرك على المساكة !
كل ما تمسك .. تفلت .. وده سر الشطاره !
طول ما هو سيد قراره .. العب .. وأنت مطمن !!
بكره ربنا هيساعدك .. وتبقي منهم أخر حلاوة ..


يا بكري أنت الأمل !
تندهلي لما تعدل .. أو حتى تشوفها تمشي برجل مش بدالة !
ولا فاكرني سايبها صفرا .. تلونوها وحدكم بسماجة !!

لا يا صاحبي .. اصحي ..
ده جيل يا رحمن يا رحيم !
ولا فاكر اللي جاي ديجيتل .. تقدر تقفله يا مريح !

بكره يا بكري اصعب .. متلون بالتفاريح ..
بدل الورق .. شرايح .. واتفاقيات تهز الدين ..
تقوم تقولي بيحدثوا الصناعة .. والفرق متكوم بالسنين ؟

يا بكري كل ده كوم ..
والمهاجر من سنين !
تلاقيه يوماتي في كل شارع .. وحارة وسينما ، بيشاغل التايهيين ..
ولو زنقته فأي مكتب .. يطير بضوافر طويلة .. " معلش نسيت الروتين " !
وساعت الجد يظربن .. وبقت القضية " باين عليك عولمي .. يا عدو الدين " !

متشكر يا بكري يا صاحبي ..
بس اوعي تسيبك من شعرك .. إمال هاعرف امتى بلدكوا بكره هـتطيح ؟

معلش يا اخويا يا بكري ..
لكن برضه .. مقلتش ليا .. جايلي أمتي .. نلعبها من بعيد ؟؟؟؟؟؟؟؟؟؟؟؟؟

محمد بكري

والله كلماتك حلوة
والطابع فيها غنيوة
ولما أسمعها أتعجب
لية كنت غايب ف الليلة
أهلا وبيك أتعرفنا
ف حكاية ليك وأتشرفنا
وقلى أمتى تشرفنا
ف ندوتنا تيجى وتعرفنا

أخى محمد بكرى
نص به نسبة بوح عالية
و حميمية محببة
و أن كنت لا أفهم الإهداء
فأنت تهديه الى المهاجر القديم
أوك
لكن النص موجه لبكرى !
و أنت محمد بكري
فهل النص منك إليك ؟
خالص الود

اعزائي واخوتي كرام الرأي والدعم أ. عادل سند - أ.عاطف الجندي: اشكركم على متابعتكم الكريمة وتشجيعكم الدائم .. هذا العمل ردا على رسالة الى قائد السرب! اصل الموضوع ان صديقي محمد عبد الرازق هاجر امريكا 2005 وكتبت الرسالة الاولي له بوحي من هجرته - اما رد للمهاجر القديم فهي تخيلية على لسانه يخاطبنى بها.. العملين يعبرا عن حالة شخصية اترجم فيها مشاعري باصدقائي واحبائي ... وهي سمة حياتي التى اوثقها بالادب!