متغيّر ثابت ((( عمك هوارى )))

متغيّر ثابت ( عمك هوارى )

مشنّه فول رطب بارد

وجلابيه

جيوبها ملانه ب النيه

وغرقانه بقع وهموم

عفر من نومة الشارع

وبقعه زيت على كمه

مبروزها اثر فاكروا

لأخر يوم دخل جوفه

زفر بايت

وعمه لونها متحيّر ما بين البنى والابيض

تعد عينيك

خطاوى من زمن عدّى على وشه

وساب للذكرى تجعيده

ف حجم صوباعك الخنصر

يخش عليك

ك ليل باسم

ب يتهادى على موجه ترش الملح حنيه

عينيه ب تطق ملاغيه

وب الضحكه

يشد العقل لكلامه

وب الكلمه

يحفر ف القلوب اوجاع

يسخّر فيا عفريته ف أسمعله

وديلوجوه

يخلّى الودن تخضعله

ومزيكته براح الموج

تنغّم نقره ع الإحساس

وصوته تخين لكن مخلوط

ب رقه رمل يتعافى على الاصداف

يعرّف نفسه للقاعد ب يتأمل

او اللى ب واحده يتجمل

او الشارد

او المهموم

او السقاعن ومتكلفت ب تل هموم

يخش عليك يقوم قايل

--------- محسوبك عمك هوارى

بياع الفول السرّيح

وضميرى صديقى المتزربن

ومتيم جدا وجريح

وب أقول الحق ومبخافشى

واضح ومحدد وصريح ----------

الله

الله ع الدخّله اللى تخلى

القلب يصاحب دقاته

بنى ادم ايوه ما بنكرشى

ولكنه مصنف إنسان

ولا ينفع يتقال متسول

ولا يقبل يتقال غلبان

احلامه افلام كارتون

متطعّم ب فصوص الزهد

متشّرب حلم المساجين

يتكلم وياك ك سياسي

وشويه ويقلب لعيب

ام ناقد للوضع الحالى

ورياضى وتحسه خطيب

على مادنه جامع ب يأذن

وإمام ب يصلى التراويح

وخبير ف الحب اللى يعشّش

ف قلوب الناس السهرانه

ولاتقدر غير انك تضحك

على وشه ساعة ما يناكفك

إكمنك قاعد متلذذ

ومكتف ايدك قدامك

مش راضى تطلع خمسايه

علشان لو طلعت من جيبك

ها يخدها ويمشى على طول

ويسيبلك بس يادوب دعوه

مع كبشه من فوله الناشف

تتلفت حواليك مش عارف

دلوقتى ميعادك مع مين

وتلف العالم كام لفه

وبترجع ولنفس اللقطه

وديكور المشهد متغيّر

كورنيشك مش فاكر إسمك

وب تلمح ب عينيك الهدمه

ومشّنه ما فيها غير الفول

وتدردش وياه من تانى

وتدس ف ايده الخمسايه

يدعيلك ويطير على طول

وترن ف عقلك تنغّيمه

وتدندن بعديه وتقول

__ عمك هوارى

المتدّارى ف مشنه فول

لو حلم اتسحب على نومه

يصحى على طول ___

الجميل عمرو
قصيدة تدل على نضجك الفني و الذى واكب جمال الكتابة لديك و إحتفائها بالصور
و ركوب البحر الشعري و الذى قد يهرب منك أحيانا و قد تخرج منه لتركب بحرا آخر و هكذا
و لكن يبقى الشعر الجميل المحتاج لإعادة نظر فى موسيقاه
و الحميمية مع العم هواري لأنه ببساطه هو ملك للجميع فنجد فى أشخاص نعرفهم
و غن تغيرت الأشكال و الأسماء و الأماكن
دمت جميلا
أخوك

استاذى الغالى
مرورك الكريم اشتقت اليه
وتوجيهاتك وارشاداتك الغاليه دائما تنير الطريق
تقبل فائق احترامى وتقديرى واعزازى
دمت بكل خير

يا سلام على اسكندريه وشط اسكندريه الذى يلهم الشاعر
ويا سلام على عم هوارى بتاع الفول السودانى .
هذا الرجل الذى غير مفاهيم كثيره عند شاعرنا / عمرو شاهين
هذه ثالث قصيده تكتب عن موقف حدث على شاطيء البحر
وبطله هذا البائع المتجول الذى شحن شاعرنا بثورة الكلمات
وأعاصير الاحاسيس الشاعره .
قصيده جميله يا عمرو اهنئك عليها فقثد كتبت بإحساس رائق
واسلوب راقى فمُتعنا وسعدنا .
مودتى وتقديرى ...

قصيدة جميله تقبل مرور واحترامى

ابويا عادل عوض سند
والله ما عارف اقولك ايه
فعلا شط اسكندريه له مفعول السحر
ولكننى بعد زياره اسكندريه مرتين بس اكتشفت سر مهم جدا
صحيح انا وقعت فى حب اسكندريه من اول كوم زباله شفته
(اول منظر قابلنى كان كوم زباله فى محطه محرم بيك )
وصحيح اسكندريه دى فيها سحر غريب عامل زى الهلب اللى بيشد السفن ويثبتها ف مكانها
لكن العامل الاساسى فى السحر ده
هو الناس
ناس اسكندريه البسيطه الرائعه البحريه عملين زى اصداف البحر كلهم مختلفين بس كلهم مشتركين فى صفه الجمال
ابويا سعيد ان عملى عجبك
تقبل فائق احترامى وتقديرى واعزازى
دمت بكل خير

استاذه منه الله
مرور غالى وتعليق رقيق
تقبلى فائق احترامى وتقديرى
دمتى بكل خير

نص رائع وتحياتي لهذا المتغير الثابت أعجبني تحويلك للفكرة بطاقة شعرية عالية وتعمق وتحويلك شخصية عم هواري بتاع الفول اللي أنا وانت اتفقنا نكتب عليه قصيدة لأسطورة لم أعد أعرف هل تكتب عن هواري أو الوطن أو الحناطي صاحبك أو عمرو شاهين ذاته ولكن ما ادركته أن هذا المتغير داخلنا وحولنا ثابت حتى في تغيره ومتغير حتى في ثبوته وما زلت أطمح في نصوص عمرو القادمه في اختزال يسمح بتدفق شعري عالي في مساحة أضيق تحياتي يا جاااااامد

حرام عليك والله تعبت القصيدة حلو أوى أنت عارفة دأنا ممكن أرسم كل اللى أنت قلتة دة ف لو حة محصلتش أرجوك براحة علينا شوية مشعايزبن نقدم معاش بدرى ونقعد ق البيت دايما جميل يا عمر وعمك هوارى محبرنى
ويجنن ف جميع أحوال
لو مرة هيكونلى سياسى
أو عربية ف الفول بيدمس
أصل التدميسة عجيبة ف كلامك
دخلت على جوفنا
وأنا لسة والله مكلتش
لكن شبعانة مشفتش
من أطعم أشعارك أكلة
بس أرجوك وتملى
قلى عشان أوفر ف البيت
لما أقرى لقصايدك تانى
عمرى ما كون
لحظة أتغديت

afro

يا اختى معاش مبكر مره واحده
والله انا اللى بفكر ف الاعتزال بعد ما انتهى من المشروع اللى بكتبه دلوقتى
هايكون اخر حاجه تقروها لعمرو شاهين
هاتكون العهد
مرورك الغالى الرقيق احسد نفسى عليه
تقبلى فائق احترامى وتقديرى
دمتى بكل خير

نحن لا نقبل الأعتزال من عمر شاهين فنحن كلنا أسرة مترابطة وتعاهدنا على ذلك
afro

معلش بقى يارشا
والعمليه مش اعتزال من المنتدى بس
لكن اعتزال من الحياه الادبيه
وعموما لسه قدامى لغايه عملى الاخير لما ينتهى
لغايه لما اخلص كتابه قصيده ( العهد )
وده هايكون اخر عمل للعبد الفقير عمرو شاهين
بس الصراحه
ولا اقولك اخلى الكلام فى وقته احسن
تقبلى فائق احترامى وتقديرى واعزازى
دمتى بكل خير

الصديق الرائع الراقى
محمد عبد المنعم الحناطى
كيف الحال ؟
على فكره انتا عارف انى مش بحب الكلام الكبير ده
وبعدين يا عمنا فين قصيده عمك هوارى اللى انت المفروض تكتبها
انا مستنيها
اما موضوع اختزال القصايد والله يا حبيبى انا بحاول ف الموضوع ده بس احيانا الحاله تكون محتاجه مساحه كلاميه كبيره واحيانا لا
عموما مستنى منك عمك هوارى بامضاء الحناطى اللى انا عارف انه ها يطلعها رائعه
وممتازه
تقبل فائق احترامى وتقديرى واعزازى
دمت بكل خير

عمرو شاهين لا أقدر

سوى اعبر

بكلمة الله

على ابداعك وفنك الجميل

دمت بكل حب وابداع

ملحوظه

تثبت القصيدة بواسطتى

لروعة الحرف والمضمون

الشاعر الرقيقه
والزهره الزرقاء الراقيه
الاستاذه ام القمرات
والشهيره ب عزه الزرقانى
مساء الخير
والله كنت هازعل خالص لو مكنتش شوفت ردك على القصيده دى
عموما ملحوقه انا اصلا مقدرش ازعل
تعليقك نكهة التميز لموضوعى
تقبلى فائق احترامى وتقديرى واعزازى
دمت بكل خير

الشاعر الجميل عمرو شاهين
الله عليك قصيده فى منتهة الروعه والجمال

عمك هوارى بتاع الفول
يخد ك على طول
تسرح وياه
عمر ما تنساه

جميل جدا ما كتبت ياعمرو
أبدعت فى تصويرك وكأننا امام
فيلم قصير متخيلين بطل الفيلم بشكله وأسلوبه وأفكاره
وكانك رسمتلنا لوحه جميله بكلماتك وتعبيراتك
بجد انت مبدع وربنا يوفقك
واتمنالك المزيد من التقدم بأذن الله
تقبل مرورى وتقديرى لشخصك

الاستاذه الراقيه
اميره البدرى
بيتوه الكلام من على لسان من حلاوه ردك الغالى الرقيق
اطراء غايه فى العذوبه والرقه
والحمد لله انى وفقت فى النص ده
والحمد لله انه نال اعجابك
تقبلى فائق احترامى وتقديرى
دمتى بكل خير