اوهام الغربة

اوهام الغربة

وليه نترك منازلنا
وليه نطاب من الاوهام تنازلنا
بمرسيدس موديل جديد
وشقة ملك فى مارينا
وعفش عروسة مستورد
ومسنيه على المينا

وانا صابر وبتحمل
لانى ياناس بكل حماس
شربت مرار غربتى لوحدى
فى كاس ورا كاس
وياما شقت فى الغربة
قساوة من كفيل واعر
رابطنى فى الطاحونة هناك وانا دابر
واثور بس جوايا
ومش قادر
احدد حتى من نفسى
وافول امتى انا مسافر
ولما ارجع لبلدى
أاقول اانا حالف لموت فيكى
الاقى الغربة تشاغلنى
واشاغلها
تغازلنى واغازلها
واخر الدنيا تندهلى
وليها ابيع ميراث جدى
وافوت ناسى وافوت اهلى
عشان انزل ولو حافى ف منازلها
وارجع ويا مرسيدس
وشة ملك فى مارينا
وعفش عروسة مستورد
ومستنيه عل المينا

وعمرى يضيع عشان اشياء بتغرينا
واسال ليه بقه نترك منازلنا
وليه نطلب من الاوهام تنازلنا
وليه الغربة تبعدنا عن الجنة
دى مص الجنة ياسيدنا
ولا نقدرشى نستغنى
ولو ناوى السفر
سافر كده لوحدك
وانا كفايه هنا احضن منازلنا
ولا نفارق فى يوم بلدى
ولا اترك هموم بلدى
وناس بلدى
وخير بلدى
ولا نطلب من الاوهام تنازلنا

من ديوان غنوة الحب الحديثة الصادر سنة 2000
فوزى الشربينى

أستاذى الشاعر الكبير
فوزى
عذوبة الكلمات وروعة الصور
واضحة و جليه
بارك الله فيك
شاعرنا الكبير

الاخت العزيزة المتالقة دائما
الاستاذة بنت النيل

اشكرك على مرورك الكربم
والتعليق الفورى الجميل الذى اسعدنى كثيرا

واسمحلى لى ان اقول
ان بداية القصيدة
معذرة سجلتها خطا لاسعجالى
اما بداية القصيدة فهى

وليه نترك منازلنا
وليه نطلب من الاوهام تنازلنا
وليه الغربة تبعدنا عن الجنة
يرد جواب
يقول يا احباب
مازال العشق للغربة سبب مجهول
وما زالت وما زلنا
نغازلها وهبه كمان تغازلنا

الاستاذ الشاعر فوزى الشربينى
الى الآن لاتدرى لماذا احبت الناس الغربه ؟
سؤال صعب الاجابه عليه
اسأل مصر وهيه تقولّك .
ليه الناس بتسيبها وتمشى
لما فى بلدك تشرب ذلّك
يبقى نسيبها ولو على رمشى
لو الناس لقت لقمة العيش هنا . ايه اللى حا يخلّيهم يمشوا ؟
لو الجواب عندك تكسب خمسه وسبعين قرش .
فاكر لما كان للقرش قيمه .
كان الجنيه المصرى بتلاته دولار .يااااااااااااااه
ولسه بتسأل الناس بتمشى ليه ؟؟؟؟؟؟؟؟

الشاعر الكبير عادل عوض

شكرا لمرورك اولا

ثانيا عاجبك بعنى البهدلة اللى
بيتبهله الشباب
اللى بتجرى ورا السراب والوهم ويضحوا بارواحهم
لو عنك الحل البديل
تكسب خمسة وسبعين مليم

الله عليك وعلى نصايحك الغاليه

استاذ فوزى

بس ياريت يعملو بيها

ويعرفو أن رب هنا رب هناك

وميرموش نفسهم فى التهلكه

دمت مبدعا قدير

ا

شكرا على مرورك اولا
يااستاذةعزة
هى مشكلة صعبة جدا
وحضرتك قلت الحل
رب هنا
رب هناك
والرزق اللى مكتوب لو
لو بالسحتوت مش حا تاخد
غيرره واجرى يابن ادم جرى الوحوش
غير رزقك لن تنول
واجتهد بس ماترميش نفسك فى التهلكة
وشكرا

ياعزيزي الأستاذ/ فوزي
المشكلة إن الغربة أصبحت في داخلنا
فحتى في مصر برضه باجد شعور بالغربة
وأنا برة مصر حاسس بالغربة
وأنا في مصر ساعات أغلط وأتكلم بالانجليزي مع سباك أو عامل
أو أتكلم بلهجة خليجية أو عربية
أو أدي ميعاد لواحد في المقطم على أني حاوصله بعد نص ساعة وناسي الزحمة
أو أخلي واحد ماشي في الشارع فاقف بالسيارة علشان يعدي وهو سلوك طبيعي فالاقي اللي بيعدي باصصلي على أني مجنون
الغربة بتجيب غربة.. ومع الغلاء الفاحش اللي حصل في مصر
الغربة أصبحت للبحث عن الستر .. ونعني بالستر الحياة الكريمة
أدعي لي بالاستقرار في مصر مع القدرة على توفير حياة كريمة
تحيتي لك ولقصيدتك الرائعة
أخوك
طارق

جيت على الجرح وفتحته إدعيلنا نرجع في أحضان بلدنا ونبقى مع الناس الحلوة اللي زيكم بس بشرط نلاقي نأكل
قصيدتك جميلة جداً يا أستاذ فوزي أدام الله إبداعك .

أخوك المتغرب ( منير منيب )

اخى العزيز الاستاذ طارق
واخى العزيز الاستاذ منير

اشكر لكما مروركما على قصيدتى التى كتبها من زمن
واشكر لكما التعليق عليها
واقول
انتم اصحاب رسالة تؤدونها
وانا اتغربت ستة شهور عن بلدى
وكنت ملحقا اداريا باحد سفارتنا بالخارج
وكان احساسى بمرارة الغربة كبير

اعنى بقصيدتى حماية شبابنا من الجرى وراء الاوهام
والتضحية بحياتهم الغالية

بلدنا بخير والخير كتير فى البلد ياكل بلاد جنبها
لو اللصوص اللىفيها يبطلوا سرقة ونهب
وشكرا

جميل ان تولد الغربة هذه المشاعر الجميلة
أخى الحبيب فوزى
فمن رحم المعاناة يولد الجمال
و لكن من منا لا يحلم بما جاء فى بداية قصيدتك ؟
........................
رائع كما انت يا سيدى
أخوك

اخى العزيز واستاذنا الغالى
الشاعر الكبير الاستاذ عاطف

شكرا جزيلا لك على مداومة مرورك الكريم
وتعليقك الرائع

انا معك كلنا نحلم ببحبوحة الحياة
والاحلام والطموحات مشروعة
ولكن دون ان نجرى وراء الاوهام والتهلكة

السلام عليكم .. مجرد رأي

الاستاذ الشاعر / فوزي الشربيني

احترامي وتقديري

من الرائع أن أقرأ هذه الكلمات الرائعة والمعبره

والتي تعبر عن مدي مرارة الغربة وصعوبتها

من خلال تجربة حتي ولو كانت مدتها الزمنيه بسيطة , وان كان العمل خلالها

ليس بالقسوة كباقي الاعمال التي يزاولها الآخرون في غربتهم

فبالفعل

أوجزت واختصرت لنقرأ مابين الحروف والكلمات ,

ولكنك أنجزت وعبرت عن مدي المعاناه التي يعيشها المغترب بكل معانيها

ومدي قسوة الغربه في كل لحظاتها علي نفس المغترب

وياليتنا نقرأ فنتعلم ونتعظ من تجارب المخلصين لنا في النصيحة ..

الا أننا بالفعل نجد من الناس من يغترب من أجل تحسين المستوي المعيشي

مضطريين ومتحملين ومتحاملين علي أنفسهم سعيا علي الرزق رغم المعاناه

وهذا ما أوصانا به رب العزة في كتابه الكريم , ونصحنا به سيد المرسلين

وهناك من الكثيرين بالفعل من هم مغتربون رغما عن إتجاهاتهم وميولهم

ولكن مرغمون عليها

وأيضا للأسف نجد من الناس من يغترب من أجل زينة الدنيا

التي سرعان ماتزول فلا هو استفاد من غربته ,

ولا هو استقر في بلده وسعي الي الرزق واجتهد فأكرمه الله

الاستاذ فوزي

أشهد بأن كلماتك تعد من النصائح في زمن قلت فيه المروءة , وجاءت معبرة

عن هموم الكثيرين أيضا

الجميل أنك تحس بآلام الآخرين من خلال تجربتك البسيطة في مدتها

إلا أنها تركت الأثر السلبي لمعني الغربة وقسوتها

, وتحاول أن يتجنبها الآخرون حرصا عليهم

فعبرت عنها في كلمات نابعة من القلب إبتغاء مرضاة الله

أشكرك يا أستاذ فوزي

فقد أكدت لي بأن الدنيا مازالت بخير

وللجميع تحياتي

ومن أراد أن يقبلها

اخى العزيز والمبدع الجميل
الاستاذ ضياء

اشكرك على مرورك الغالى
وتعليقك القيم
وارجواان يطلع عليه جميع الاحباء
فهو اقيم كثيرا من القصيدة المذكورة

اشكرك مرة اخرى على التعليق
الذى افادنى كثيرا وتطابق فى معناه فيما كنت اقصده
شكرا لاستاذنا ودمت محبا للجميع

باموووووووووووت فيكـــــــى

وباأعشــــــــق مـلح أراضيكى

لكــين مش عارفــــــــــــــــــة

أراضيكــــــــى

يا ســـــــــمرة ، ياحُــــــــــــرة

يا عـاشـــــــقة

يا ضـــــــامـة الدنيــا دى بحـــالها

وأنـــا .. لأه

أســــــتاذى العزيز / فوزى الشربينى

شـــــــــــايف قصـــــــــيدتك الجمــــــيلة عملت فينا إيــــــه ؟!!

وداد الهــــــــــــــوارى

الاخت العزيزة الشاعرة الكبيرة الاصيلة
الاستاذة وداد الهوارى

انتى استاذة فعلا
وقصائدك هية بتشجعنا وبستفذنا للكتابة
من جمال موضوعاتها المؤثرة
شكرا لمرورك
ودمتى ودامت محيتك للجميع

» الغربة عتمة
» الغربة
» زاد الغربه
» سنين الغربة وخدانى
» موال الغربة