زهقت

خلاص أنما زهقت من الشعر والشعرا
زهقت من الشعر لأن لغاية دلوقت مش عارف أكتب نص يكون علامة فى تاريخ الشعر
ولان كتير من الاشعار تحت المستوى
وزهقت من الشعرا لأن أغلبهم مرضى نفسيين حاسين أن كل الناس بتحاربهم وبتسرق شغلهم
طب والله العظيم لو ده حصل معايا حاكون فرحان جدا لان ده معناه ان اللى أنا كاتبه مش عارف السارق يكتبه عشان كده بيسرقه
كتير قوى باقرر اترك الشعر وانسحب بعيد عن الشعرا بس من غير ما أحس ألاقى نفسى مسكت كتاب أو سمعت قصيدة شدتنى صحيح بامسك نفسى على قد ما أقدر
لكن أعمل أية لما أحبس جوايا الشعر
جربت ده مرة ورفضت خروجة كام يوم كنت حاموت والله صحانى من عز النوم
ده غير الايام اللى كان محبوس فيها كنت زى المجنون
يارب ارحمنى من هذا الداء

ما قدرتش أكونلك غير أبنك
كان ليا رأى عن ماتش مصر والجزائر يخالف معظم الناس
لكن ده كان قبل الماتش
بس لما قعدت أتفرج عليه
من غير ما أحس لقيت نفسى باحبك يا مصر
زى بنتى لما تعيط على حاجة ممكن تأذيها بامنعها وممكن أخليها تعيط لكن فى النهاية بانفذ طلبها غصب عنى
بس ياريت الناس تفوق للى بيجرى وما تاخدهمش فرحة الفوز