الوعد السافل

من ساعة الوعد السافل
بتاع المفضوح بلفور
وإحنا في الأرض أسافل
والكل عليه الدور
من قبله سيكس بيكو
قسمونا شاطر مشطور
قالوا لسة حنوريكو
قولنالهم لموا الدور
قالوا حناخد أراضيكم
قولنالهم لأ مش سايبة
سيبوا الأحبال الدايبة
أراضينا حنحررها
والفرصة جت في أيدينا
بغروب للقوى العظمى
وظهور أمريكا وروسيا
كشروق للقوى العظمى
ولعبنا عـ الحبلين
فاكرين نفسنا حدقين
اتارينا لعبة سهلة
يلعب بيها اللاعبين
واتاري القوى العظمى
تستاهل ضرب الجزمة
والعيشة صبحت أزمة
لما وقع السوفييت
والعم سام حكمنا
حكم النار والديناميت
............................
عشنا ميت وعد ووعد
ونلاقي مفاوضات
ووشوش تتلاقى بود
وورا ظهورها ضبنجات
المرة دي ايجابية
واللي بعدها مقضية
والمرة الجاية مثمرة
وبناءة ومزهرة
وأدمنا التفاوض
والرفض والتعارض
وطالما قادر تعارض
يبقى حتفضل مفاوض
ولو في يوم توافق
حتلاقي ألف عارض
وأدينا بقينا تاريخ
صوت بيولول بصريخ
وبيوت هدماها صواريخ
واتحولنا مشاهدين
والشكوى حتبقى لمين
غير الحي المعين
اللي لو أخلصناله
وبقلوبنا رجعناله
قادر ينصرنا عليهم
نصرة بدر وحطين
................