رقم قومى

رقم قومي*(1)
ومن الشمال
صفريين وتسعه
وسبعه واحده
وخمستين
009755
......................
الاسم :-
حبه حروف متنطوره
في شكل غاية
ف الانتظام
ولكنه جواه هرجله
يعنى مثلا
لو قلبنا حرف واحد
ف الوسط
جبناه ورا
برضوا ينفع يتنطق
من غير مشاكل
ف اللسان
..........................
العنوان :-
ساكن ف اوضه
جوه شقه
جوه عطفه
جوه حاره
جوه شارع
وسط اهلك
اللي ماتوا
مرتين
مره بالسر الالهى
ومر لما قولتى
خلاص كفاية
روحتي باعته
نص اهلك للمقابر
دفعتين
.....................................
السن :-
هما يادوب عشرين
سنه و زيادة
جوز
يبقى العدد
واضح قصادك
ع الورق
وللحكومه
و المدارس
ولحبيبتي
واللي ناوين
يقتلوني
لما توصل
حسبتي نفس
العدد
زائد تلاته
وتاتا بمشي بزحف
للنهاية المحكّمه
الخيه واضحة للضرير
ولكنى واخد سكتي زى الحمار
.............................
المهنة :-
عاطل للأسف
مع أنى عندي
م الصنايع
مجموعات
نجار مسلح
لأ وبنا
ويا شاعر
ويا مخرج
ويا حاوي
وزير نساء
ولكنني رافض
أنى اعمل اى حاجه
لوحده رافضه إنها
تلبس هدومها
وتتعدل
وتفكها شغل البغايا
والغجر
..............................
الديانه :-
الحسبة واضحة للبشر
في قوه عظمى
للإله
أمرت ب خلقي
ف أتولدت
تبقى الديانه
شيء مقدس
لكنه محصور
ف الناحيتين
في ناحية منهم هيا أنا
والتانيه هيا ربنا
أظن واضح
والكلام مفهوش
غموض
................................
النوع :-
بشر
ذكر
( خالي من كل العيوب
الانتاجيه القديمة
بس نازل برضوا
ب شويه عيوب
لكن جديدة
أهمها
ضعف البصر )* (2)
والثبات على المبادئ
والطموح
ومن عيوبي الخطيرة
أنى غاوي مرجلّه
وماليش هواية أنى امسك
ف الفوط
او حتى ارفع اريالى
واعمل عبيط
.....................
فصيلة الدم :-
الدم نيلي
بس نابع م الغابات
جواه كرات
بيضا وحمرا
وكبرياء
وكمان كرامه
لكن مريض
ب الأنيميا ف الخيانة
والخديعة
وكل باقي الإنزيمات
اللي توصّل
للكراسي
والفلوس
............................
الصورة :-
الملامح اللي شاربه
الطين شراقى
اللي معجونه
بهموم كتيره ف الزمن ده
أولها
جوعها و رزقها
و ازاى هاتحفظ عرضها
وتانيها
بكره واللي جاى
و ازاى نروح المونديال
والسياسة
والمباني
والحماسة
والعرب
يعنى الملامح
هيا واحده للبشر
لو إن
مخلص عب قوى
ماشى ف شارع
وجنبه حامد مرتضى
ومسيحه متى
سابق بخطوه
للأمام
عايز يحصل
بنيامين ابن أم ليفي.
دققي بين الوشوش
والرهان حاطه أنا
لو قدرتي
تطلعي
واحده ملامحه
غير أخوه
يبقى إيه لزمه
صورنا ف البطاقة؟؟؟
............................
الجنسية :-
غصب عنى
اسمي مصري
غصب عنى بحبها
مش راضى اغيّر ملتي
ولو أنى زعلان منها
اكمنها
رافضه قلقي ولهفتي
قدمت لكي كل
أوراق اعتمادي
علشان توافقي
أنى أكون
مصري أصيل
قدمت فيشي
ب بصمتي
ومكان ميلادي
ف الشهادة
هو حضنك
والدمغة كانت
أيد وطارت
ف الحروب ..
مش راضيه ليه
تعترفي بيا ابن
شرعي
وليه بحس أنى
مواطن
درجه تالته
او سبنسة
نفسي اركب درجه
ف المكيف
رجه أولى
هيا امضآ واحده منك
وأتنقل
وأبقى واحد
م اللي شافوا
يوم مسكّر
ف المرار
......................................
*(1) هذا لاسم تم استعماله مسبقا في إحدى الأفلام القصير التي تقدم في مشاريع التخرج في المعهد العالي للسينما ولكن قصه الفيلم لا تمت لمضمون القصيدة بصله
*(2) ورد هذا المعنى في قصيده( صديقتي الهندية) للشاعر الساخر الشاب / عمر طاهر في ديوان ( قهوة و شوكولاته ) ولكن مع اختلاف الأسلوب .