أُمِّيَّات عبد الله جمعة (الجزء الأول )

الأوله آه

والتانية لا

والتالته أيّوه



الأوله آه ..

على الأهل اللي باعوا اللحم في سوق النفوس

و التانيه لا ..

على الحر اللي ذالل نفسه في زمن التيوس

التالته أيوه ..

على صاحب يبيعك لاجل ..

حكّه ف لحم أنثى أو عشان ...

حفنة فلوس



منين أجيب ناس لمعناة الكلام يتلوه

قلب الشريف اتنكس والنكسه كانت من أخوه

ويّا ابن عمّه ...

وكان تالتهم برضه أخوه

جابوا الغريب واتجمعوا ...

بتراب فلوس راحوا يبيعوه



نجع العوانس والقرون

وقانون ...

ملّزق ...

كعبلون

والقاضي لما شافهاوافقه مقصَّره ...

ف طول الجيبون

دلدل لسانه وبل حجر البنطلون

طب بس فين نلقى البراءه ..

ف قلب محكمة القرون



يا حلوه كان راح فين شبابك

لما الحزين دنِّس ترابك

والمكلوبين تاجروا ف عذابك

قولي لي إيه كان بس نابك



باعوا القضية ف قاعدة فيها لحوم طريه

ف مؤتمر داسوا على ..

أحلام نديه

رزعوا السلام ..

غرسة ندامه بروح غبيه

لما انتِ حره ..

ليه لبستي توب غازيه



راح الخسيس سلم دمانا بدون تمن

باع الرجوله البايره ..

في زمن المحن

قال إيه !!

ها يخطب وحشه بوّرها الزمن

جاته ألف وكسه ..

وألف نكسه

ابن الوطن



كانت حدودك راجعه بشوية تعب

عمر اللي وطّا في يوم..

ما يصلب عوده بشوية حطب

عمر اللي دبّل صوته ما يقدر ..

ف يوم يطرح غضب

عمر النوى ما نقول عليه ..

ف السوق رُطَب



كان أصله واطي ..

عاش مطاطي ..

لليهود

باع لحم طاهر لاجل ما يرجع حدود

زي خايبه باعت طين مخصّب ..

لاجل ما تكسب ..

بوكيه مليان ورود



هايموت ف يوم منحوس ..

يموت تحت الجزم

عوَّاد زمان باع أرضه ..

من غير ما التزم

عواد رحل وفضيحته باقيه ..

حزم .. حزم

كسب الفلوس .. خسر النفوس

يبقى انهزم



عوّاد خسيس ..

أهو مات فطيس ..

والناس لاموه

عوّاد أخوه ..

هايموت رخيص ..

أصل اليهود ما هايشتروه

باع عرضه ..

أصل العرض أغلى ..

هايشتروه .. وراحَ ايْبيعوه

ده العرض خالد ..

أما زفت الطين ..

يغور .. ملعون أبوه



يا مرتاحين من أهلي ..

فين الراحة فين

أنا لو تعبت ما ترتاحوش

دامت لمين

بابكي عليكم دمعتي ..

هاتقيد سنين

ده انتو الغلابه الدور عليكو..

يا مجروحين



أنا عشت حيرتي ..

وجايه حيرة قلبكم

مش هاتلاقوني ..

واقفه أسنّد جنبكم

أنا حرّه وانتو عبيد لجزار لحمكم

أنا حرّه رغم القيد ..

وفين هاشرح لكم



يا ناسي ليه سيبتوا الديار

يحكمها وسط الزحمه فار

لو طفل منكم قام عرق ..

يحرق جدار

ليه سيبتوا ميّه .. وسخه .. نجسه ..

تطفّي نار



أنا دمعي من بين الجفون ..

سايل وهايم

ع الخدود يجرح ..

ويطرح مرّ غايم

بسمتي ماتت ..

وفرحي لسَّه نايم

والشرف .

فين الشرف ..

مطرود وصايم



فرّحوني بالأماني .. والأغاني

وانتو بتسمّوا ف كياني

عاجزين ..

وليه عاوزين حصاني

سيبوا ابني يركبه ..

يحرر زماني



شيلوا إيدكم ..

سيبوا إيدي ..

بس لاجل يقوم وليدي

سيبوا دمه ..

يزور وريدي

بكره يرسم لون حدودي



عذّبوني ..

بس ما تزفّوش عذابي

واوعوا يوم حزني ..

أشوفكو تدّقوا بابي

بس اوعوا تشلوا تاري ..

ف عين شبابي ..

لو سكتّم عنّي ..

بكره راح احرّر ترابي



أصل المصيبة ..

تلقى واحد قام وعامل شيخ قبيله

جاته ألف نيله

يبرم شنابه في اتفاق عاجز ..

ما لوش ف الدنيا حيله

يا عم سيبني لوحدي ..

هابني ألف عيله



عامل لي نفسك ليه زعيم ..

ووصي عليا

وانت مش عايش وجيعتي النايمه فيا

بس لو تصبر شويه !!

وتسيبني احلّ أنا القضيّه !!!



يا ما قالوا الناس زمان..

يكفينا مُرُّه

يعني لا مِنّه ..

ولا كفانا بلاوي شرّه

يخنق نسيم حريتي !!!

ويدّيني حَرُّه ؟!!!

لا سابني اجرّه !!!

وراح بعيد ما رضيش يجرُّه !!!



قالوا القرايب زي عقارب

أصل دي خلاصة تجارب

تلقى القريب يبكي عليك ..

لو كنت غالب

ولو العدا جم يوم طالوك ...

مش راح يحارب



ما يجيش م الغرب يسر القلب

ما نطول منهم غير ذلّ وكرب

بيهزوا ف ديلهم ...

لمّا يطولوا صداقه وقرب !!

يمسكوا بسنانهم وتقوم حرب

واحنا المتاعيس بنحب الغرب



قاموا يعينوه في قبر أبوه

سرق القدوم وهرب يا هوه

ملعون ف كل كتاب ...

كمان ..

ملعون أبوه



يا عاشق الشعر الحزين ..

هات مِخْلِتَك

أنا عندي منه جبال ..

هاتتعس حضرتك

لكن في قلب المرّ ..

راح تلقى الدوا ..

هاتلاقي نور حريتك



أنا أصلي حاسس كل أوجاع الوطن

علشان عاصرت خيانة الإخوان زمن

بالت على كتافي الكلاب ..

وقت المحن

وف مزبلة صدري ..

قريت أوراق كتير

أصل الزباله ساعات ..

تطلّع علم متكلّف وفن

غلبان ما ليس لحم العوانس

أسعى بشرف ..

أبني ف عقول ..

تطلع عجول ..

تحمل شهاده ..

ليسانس دبلوم المكانس

وأفصّل الأخلاق مقاس ..

زي الملابس

عايش لوحدي ما ليش أنيس

وصفوني بالمغرور ..

لأني ماليش ديول ..

زمن الرجال ولّى وجه ..

زمن الخوانث



آه يا زمن فيك الخروف علّم

بقرونه والناس تترسم ..

وتقوله : يا معلّم

والفكر صايع ف الطريق

ما لهوش صديق

ف بلدنا دوس فوق الكتب ..

زيّ التتار ..

ما تقولش متعلّم



الغوله حاطّه الوِرك فوق الوِرك ..

في مكتب جالون

تحكم وترسم ع الشريف ..

وتقول : يا دون

والحر واقف يندبح ...

حطّ الجبين ...

فوق جزمة الباشا .. القانون

تفتح بتوته ْ مُرّه طارحه ف صدرها ..

ميت ألف باب

آه يا زمن علاّ مقام كل القرون



قلبي عليك يا نجيب سرور

عبدالله جمعة ..

بعد دورك ..

جاله دور

مجروح وشرفه بيندبح زي الطيور

شايل ديون الخلق ..

رافض يغري راسه ..

بلبس تاج مليان مرصّع بالقرون

سلّم لي ع المحاسيب ف أرض الكعبلون



ما هو شاف رجال الحكم واقفين في الطابور

يستنوا دورهم ..

لحم منتوف بالرياله ..

مالوش منظم للمرور

مبروك يا حلوه ..

جه للحمك ميت زبون

مبروك عليك يا اللي كسبت التاج..

مدندش بالقرون



ملعون أبويا لما قمت ..

وقلت لأ

وعملت راجل مش ف وقته ..

وقلت حق

أهو جابوا ألف خازوق وقالوا :

ده مستحق

حلمي البريء بكرامة الشرفا اتسرق

يا ريتني ركّبت القرون

أهو كان زمان الملك ف إيديا اتخلق



يا ابني يا سامح ..

لو تسامح !!

ذنب أبوك !! ؟

هوّه اللي جابك للضياع ..

ملعون أبوك

وأبويا ملعون زي أبوك

أصل الكلاب خدعوني قي غفلة زمن

باعوني لحم رخيص ..

وجابوا الدلاّلين لاجل يبيعوك



دا ابويا رباني على ..

شرف الشعار

قام قال لي كون راجل ..

هاتملك ألف دار

شرفك دا نار

بحصان عزيمتك راح تعدّي ..

كل ساحات الغبار

يا ابني أبوك غلب الحمار

سمع الكلام .. رفع الجبين

يلعن أبوك ..

كان التمن ..

لحمك رخص ..

وأبويا ملعون زي أبوك



الندل لابس توب أخويا ..

وقال لي : كل الناس وراك

خليك شريف ..

وبكل طاقتي هاكون معاك

وف وقت جد الجد راح قالع رجولته ..

وخان أبوك ..

طلع الشريف خنثى ..

ولابس توب شريف ..

عمّك عماني وصبّ سمه ّ ..

ف ودن ابوك

ملعون أبوك