أنا بكرهك (نضال حسن الحاج)

أنا بكرهك بس بكرهك دا أنا بكره اليوم الصنع قلبا يكورك ويندهك
أنا بكره الوطن البلم شرف الغرام المنتهك
من ياتو باب طليت عليً ماكنت اصلا بشبهك
أنا بكرهك
أنا شلت ريدك في القليب وسقيتو من دم العروق
كان النتيجه تبيع هواي
أنا بكرهك
من وين اجيب ليك الدموع ما كان امنيات قلبي الرجوع
لكني مجبور اطردك واقفل وراك باب الضلوع
أنا بكرهك
قدر اشتهاي أنا بكرهك قدر الغرام الكان زمان
كابت مساماتي وهواي أنا بكرهك
قدر أني مالوثت بيك كريات شراييني ودماي
أنا بكرهك
قدر أني غنيتك غناي من وين دخلت علي مدن
شاخت من الوجع الاليم من وين طرقت جدار قلب
نقح هوي العشق العقيم
أنا قلت ليك أنا بكرهك قدر المواسم الشاده خيل الريد عليك
أنا بكرهك
قدر المصائب الحارسه بوابة مجيك
أنا بكرهك
نفس المسافه وحجم قلبي الكان تملي بيشتهيك
بقي بكرهك
واتوكل ارحل مني فوت حرمان علي قلمي الكلام
كان غيرك اجتاح السكوت
خليه قلبي الاندفن تنسج عليه العنكبوت
او خليني من بعدك اموت
الموت اخير من اني اضل في رجاك
أنا بكرهك
وبقيت اتأسفك بتأسفك وكتين عيوني
اسوقن الشوق لانتظارك لما ليلي اسوق محاسنه وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو ورحل عشان اسكن مدارك
كنت مالي زمان ومالك
لكن وحاتك بكرهك
ندمان علي عمرا معاك ضيعته في غفلة زمن
ندمان علي دمعا سكبته علي رضاك بلا ثمن
أنا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
أنا بكرهك
كل مايطول ليلي ويواتيه العذاب انا بكرهك
كل ما القلم يركب مصاعب الدنيا يمشي علي الكتاب انا بكرهك
من كل باب انا بكرهك
واتوكل ارحل من جواي غلطان اذا قلبك هداك
اتوكل ارحل من جواي عيش العذاب الباقي فيك
ولو قلبك اتجرأ رجع حقك تلومه علي مجيك
عشان قلبي انت مليته دم ماعاد له باقي اسيبه ليك
علي كل حال انا بكرهك
عدد الحصى وعدد الرمال انا بكرهك
عدد الصواب والاحتمال انا بكرهك
عدد الحقائق والخيال انا بكرهك
عدد الشعر ماسن سيف الارتجال انا بكرهك
عدد الاجابات والسؤال انا بكرهك
عد مازمان فلت ليك تعال انا بكرهك
مستورة حالي وراك وفوت وليلك همو طال
علي كل حال انا بكرهك

انا بكرهك للشاعرة نضال حسن الحاج رد علي القصيده راحيل عثمان

ليه تكرهي ؟ ليه تكرهي؟
ليه تكرهي ؟
ليه تكرهي القلب البنادي علي غريبا ماهو في؟
ليه تكرهي الوطن الجمع اشلاء غراما منتهي؟
ليه تكرهي القلب النبض بي حبو قلبك من سنين؟
ليه تفتحي الباب للدموع؟
ليه تزرعي الشوك في ارض كانت تضم الياسمين؟
شبهك قليل,,, ياشامخه زي قمم الجبال
ياحلوه زي زهر الربيع ،،،،،، ياساطعه زي شمس الضحى
يالوحه ضاجه حياه وشعور,,, ياحقيقه اروع من خيال
ياسامقه زي شجر النخيل
ليه تكرهي؟
مشكلتك الروح التفتش ديمه لي قلبا امين
لكن خساره بقي الامان حلما سراب مدسي مابين نور وطين
ليه تكرهي؟
كل الزهر حزنان عليك
حتي البحر لاقاني بي حزن السنين
فاضت دموعو عذاب وهم ,,,زعلان شديد معقوله انتي بتكرهي ؟
ماانتي جمعتي النجم اجمل عقود من الوفا
نورتي دربا بي شموع,,, قلبك وحاتك مابيعرف يوم جفا
بس اسمعي : الريده صبحت مستحيل
والعشقو من قدم السنين ياكان مصيرهم للجنون
او طعنه في جوه القلب جرحت فؤادم والحنين
ليه تكرهي؟
دمعك نشف من طول سهادك والنواح
نضمك كمل من شعرك المنسوج الم علي ماضي كان مليان جراح
شمعك طفا,,,نجمك افل ,,, نورك رحل
سجن الغرام مابشبهك
حتي الكره مابشبهك
ليه تكرهى؟
طردك مباح ,,, هجرك مباح
قفلك وراو باب الضلوع ,,, كان قلتي طفيت الشموع
كان قلتي خليت القصيد ,,, او قلتي من بعدو العشق حرمان اكيد
ليه تكرهي؟
كان اشتهاك شوق البلد للنسمه في عز الهجير
كان اشتهاك بسمة طفل بتبدد الليل الطويل
كان اشتهاك غنوة فرح بتودي للزمن الجميل
ليه تكرهي؟
كريات دماك ما اتلوثت بس زادت الحد في الغرام
عشقك جميل ,,, ماانتي علمتي الهيام
ليه تكرهي؟
زولك عرف انو القلب مفتاحو كلمه وكلمتين
خبط علي باب القلب وبدون اذن اتحكر العشق اللعين
غيمك شمس مليانه ضو,,, وشمسو من كتر الخداع دايما بتغرب مرتين
لازم جراحك تندمل ,,,لازم ضلامك يبقي ضو
لازم صحاريك تبقي نيل
ليه تكرهي؟
خيل ريدك اجتازت قصور ,,,دكت قلاع,,,دكت حصون
لكن اذا خيلك كبت ماتاسفي ,,,ماالكبوه من طبع الخيول
بس اوعي تلدغي مرتين
ليه تكرهي؟
لمن عشق قلبك سما,,,بقي طير يرفرف في السما
ليه تحبسي الطير في قفص مصنوع من الهم والانين
ليه تكرهي؟
ليه تحرمي القلم الكلام ؟
خليهو يكتب في الملام ,,,او مره يقريهو السلام
اوحتي يتزكر حنينك والهيام
بس ياملاك ماتكرهي
خلي الشمس تدخل تطل تطرد نسيج العنكبوت
خلي القمر يقعد حداك,,,خلي الحزن يرحل يفوت
ماتاسفي
لوكنتي في كونو القمر ,,ضوو انطفا
لوكنتي في دنياه غيم شمس الهجير حرقت دناو
لوكنتي في عز البرد نار اّنسك واوحشة الليل الطويل
علي زول وحيد ماليهو هم,, وفي ايدو قيد
ليه تكرهي؟
مسكين اذا ماقدرك,,,غبيان اذا ماقدرك
مابكفي لو شال الشمس واهداها ليك في يوم مطير
مابكفي لونسج الحروف بي رقه زي صوت الخرير
مابكفي لو شكرك الف,,,مابكفي لو صاد النجوم في كل ليل
مابكفي لو مسك السما ,,, اوحتي مسكك العبير
قلمك اسير في وقعة العشق المحال
شعرك جريح مابين حقيقه وبين خيال
وغناك اسير مابين مؤكد واحتمال
ليه تاسفي؟
ماتاسفي لو في عيونك شوقو بات لابد من يصبح صباح
ماتاسفي لوليلك المهموم وقف في بابو منتظر السماح
لابد من من فرحا يطل ويلبسك اجمل وشاح
لابد من زمنا يجي يسقيهو سم,,, يسقيك راح
لابد من حزنا يفتق في قليبو المات زمان كل الجراح
ليه تاسفي؟
ليه تكرهي؟
ماتندمي قدامك المشوار طويل
فيهو الكعب,,,فيهو العديل
فيهو الاجاج والسلسبيل
فيهو العشر,,,فيهو النخيل
ماتندمي لودمعك اتساقط مطر
او حلمك اتبدل شجن
او حبو من دنياك رحل
اوحتي فارقك السحاب خلاك في عز الهجير
لو طل ليلك بالعذاب قرب خلاص فجر الهنا
لو قلمك اتفجر الم ,,,اوحتي من دمعك اخد
اوحتي من دمك اخد,,,اوحتي من روحك اخد
قرب خلاص فرحك دنا
لو حتي طالت فرقتك كتلت معاني الريده فيك
روح خلاص زمن الانين ,,,ورجعتي لي زمن الغنا
ماتبكي ,,,يكفيكي الحداد,,,اتوضي بي موية الصبر
ماتبكي ,,,يكفيكي الحداد,,,قلبك كفاو اتملي فوق نار الجمر
ليه تكرهي؟
املي الصحاري ورود وحب ,,,ماتكرهي
رغم احتمالات العذاب ,,,ماتكرهي
رغم الحقايق المره في دنيا السراب,,,ماتكرهي
رغم الشنا ,,,رغم الكذب ,,رغم الضباب ,,,ماتكرهي
رغم الحنان الانفقد في دنيا مابتعرف إياب ,,,ماتكرهي
بالرغم من كل السؤالات البقت من غير جواب,,,ماتكرهي
بالرغم من انو العشق اصبح خراب ,,, ماتكرهي
بالرغم من صوتنا الصرخ يازول تعال,,,ارجع تعال ,,,لاجانا زولنا ولاصدي,,, ماتكرهى
حالك عديل بس همو دابو الليله طال
علي كل حال ما تكرهي