فـي يـــوم عــــيدك

أنا العامل على الآلة
وأنا اللي إيديا شغالة

وأنا اللي المولى ميزني
ولا عمري هاكون عالة

وأنا الفنى ، وأنا الحرفي
وأنا الساعي إلى هدفي

وتعرفني جميع الناس
شريف ، والشغل دا شرفي

ونفسي الحلوة بتعادي
عدَّوى الوقت في الفاضي

بواصل ليلي بنهاري
وراضي بالعمل راضي

وأكره قعدة القهوة
وأكره وقفة الناصية

ودايماً للعمل وقتي
وبيتي الشط والمرسي

وأنا الفارس ما بين ناسي
وأنا الذهبي .. وأنا الماسي

وأنا النازف فدا وطني
عشان تعلى معاه راسي

وبايديا الوطن سيد
ولا عمره هيتقيد

وبالإخلاص كمان حبة
على العالم هيتسيد

ومن عشق الوطن فيَّ
بعت لي رسالة وهدية

وقال لي لولا مجهودك
ما كان يبقى وجود ليَّ

يا راعي ف العمل ربك
ومخلص ف العمل قلبك

باحبك فوق ما تتصور
وكل الدنيا بتحبك

حلمت أكتب ف يوم عنك
وعن جُهدك وطول صبرك

لقيت وصفي ضئيل جدا
قصاد نقطة عرق منك

حاولت اكتب مافيش فايدة
وكل حواسي نار قايدة

عشان قلمي دا مش قادر
يقدم للجبين وردة

دي صورتك ف العمل حلوة
وسيرتك ف العمل غنوة

وسعيك للحلال آخرة
أكيد المن والسلوى

إيديك الخشنة مذكورة
إيديك الحرة مشكورة

وعرقك مهما كات رٍيحته
يفوق المسك ع القورة

شقاك شاهد على حالك
ورب الكل أوحى لك

من الصحة عشان تعبك
يكون دايماً راحة بالك

يا باني بالحلال بيتك
وصاين بالحلال نفسك

يا رتنا ف الحلال دايماً
نحاول كلنا ننافسك

ف يوم عيدك باغني لك
وقلبي بحب يدعي لك

تعيش دايماً تفيد بلدك
ويجي الخير على إيدك

أخى المبدع أمين عثمان
قصيدة جميلة و اتمنى لك مزيدا من التفوق
تقبل مرورى المتواضع

اخى العزيز
امين عثمان
زجل لا يكتبه إلا قلم المبدع امين عثمان
تسلم ايدك على هذا العمل الرائع .
وتقبل مرورى وتقديرى ...