ومضات شعرية

اصحى يا ابنى اصحى وفوق

ابعد عن أصحاب السوء

وان شوفت الأندال فى السوق

ماتجاريهمش وفيها تسوء

***
أوعى ف يوم ع العند تفوت

غيرفى الحق مش فى الباطل

وان كان حد له سحتوت

أوعى تجادله واوعى تماطل

***

خليك دايماً دوغرى صريح

تغلى وتبقى زى الماس

والكبر ابقى ابني له ضريح

تِعْلَى وتِكْبر بين الناس

***

أوعى يا ابنى ف يوم الكبر

أوعى يكون له ف قلبك جدر

تلقى الناس تكتب بالحبر

أسمك ويكون زى التبر

***

أوعى ف يوم على حد تعِّيب

حتى ان كان من أهل العيب

خليك طيِّب ويَّا الطيب

ومع الأندال خليك ديب

***

أوعى يا ابنى ف يوم تتغر

مهما ان كان ويَّاك من مال

واوعى قلبك تملاه جمر

لا تكون على طول م الأندال

***

أوعى تبوَّر أو تتهوَّر

وتفرَّط وتبيع فى الأرض

واوعى ف يوم ع الندل تدوَّر

وتقول له أنا عايز قرض

***

خليك حُر تملَّى شريف

واوعى للأندال تستسلم

حتى ان كان ف ايديهم سيف

ارفع راسك وابقى اتبسِّم

***

خالص تحياتى / محمد يوسف عوض الله