إهداء إلى روح إمى الغالية

إهداء إلى روح إمى الغالية

ماأقدرش يامه
أكون ناكر للجميل
وأنا زرع عمرك
ونتى عندى ف الدنيا
مالكيش بديل
وإن كان فيا شئ
من ملامحك...
يبقى دا شئ جميل
أنا لسه فاكر يامه
و من غير دليل
كنتى تِشُقى روحك وتِبقى نيل
تروى الحبايب من غير تمن
ومش كل أم على إبنها
قلبها تملى مُؤتمن
إنتى الفريدة ياغاليه
يلى كنتى حضن وسكن
يلي شلت الحمول
بقلب راضى
ولاحد شال عنك
ونتى الحنونه العفيفه
وأنا يامه دا أنا حِته مِنك
وعمر السعادة
كانت تبتدي يامه
من عندك
وأن الحياه من غير
وجودك ولا طعم ليها
أصل الحب منك
ف الدنيا يامه
كان ماليها
والحنان كل الحنان
لما أرتوى من حضنك
والدنيا أحلى وأحلى
لما أكون جَنبك
نفسى من تانى أبوس إديكى
وسمع دعاكى
(تشوف ولادك وتتهنا بيهم)
لسانى يامه بستناكى
تطبطبى على جروحى
وتروى فيها الأمل
وياعين البُكا زيدى على نوحى
سنين مشتاقه لست الكل
ومين غيرك ياغاليه
روحه ياسمين وفل
لما أشرق أو أغرب
كنت ألاقى إبتسامتك
سابقه سلامك
والشوق باين من عنيك
ومن كلامك
يابن بطنى
بلاش تعاود
كفايه بِتشْغلنى عليك
أد إيه الكون وسيع
ولايسوي عندي
أد لمسه من حنانِك
وأد إيه الميه
اللي ف البحر الكبير
مش أد حبى لِجَنابِك
عارفه يعنى إيه كلمة يامه
معناها يامه فوق كل الكلام
وكل الحكاوى وكل المعانى
معناها رحمة وجنه بالتمام
معناها ضهر وسند من الأيام
فاكره يامه أول
ما إستهجيت الكلام
لمحت ضحكه من عنيك
وأول خطوه ع الطريق
سمعت قلبك بلهفه
بينطق إصملى عليك
أد إيه يادنيا ئاسيه
لما تحرمينا م الحبايب
إحنا من غيرها يادنيا
يبقى كل شئ غايب
الله على كلمة يامه
لما ينطقها اللسان
واحشانى يامه
يلى عايشه
ف الوجدان

والله زمان يامنتدى .. روحتوا فين ياشعراء