كنا جيل

مِلاك الشعر يا مخاصم ألم روحي
تروح مني تروح اللحظة وطموحي
يضيع الماضي بحلوته
تغيب اللذة في جروحي
....
بحن لوقت نتصالح
وأقول الجاي والرايح
ونتعاتب بقا بالزوق
وتسمع شكوة المخنوق
وتاني نروق

فريحني ووارب الباب
أجيلك طالب الأسهاب
في دنيا قديمة في حياتي
بتجري في أصول ذاتي
ولذاتي في وقت مفيش
وافراحي اللي فيها بعيش
في صبح وليل

ياه علي الزمن الجميل

كنا احنا جيل

جَدّه وهزاره جميل

أتعرف بيه البرائة

في الرتوش والنني صافي

والشهامة والرجولة والجرائة

كنا نعمل أي حاجة بكل طاقة

وكان في العبنا البساطة

كلنا في اللعب واحد

مش وساطة

أبن مين ميهمَناش

كنّا عارفين كل واحد

مين معانا ومين مجاش

الفلوس مكنتش تمنعنا لغية

كنا نلعب كيلو بامية

وصيادية وسبعوية

كان يميزنا الجماعة في لعبنا

مش مهم مين كسب أو مين خسر

المهم في النهاية

كان في فرحة تضمنا

إحنا جيل وقته أنسرق ..

كان بيعمل طيرات

بالكياس أو بالورق

كان يدفينا العرق

واستلذينا التعب

جبنا كام وحدة كازوزة

وكام كمان حتت خشب

نحيي زفة للعروسة

بالعَجَل صنع العيال  

حاجة أقرب للخيال .

...

أفتكرت الواد جمال

راح في يوم يلعب أتاري

وقال في جيم هيشمعه

كنا خمسة نروح معاه ونشجعه

هو كان بس اللي يلعب

وإحنا كان متعتنا

في الفرجه معاه

كان يفرحنا القليل

رغم أشفرت الحياة

أيوه كان فينا الضعيف

واللي في فطاره عشاه  

واللي كان حلمه الرغيف

واللي عايش بالدعا

بس كان في حاجة غليا عندنا

كنا نكرم أي ضيف

لو يتوه في حيّنا

ده يجبله سندوتش

سرقه من ورا علم أمه

وده بيمسح دمعته

وده يطبطبله ويضمه

كنا لسه صغيارين

بس كنا كبار قوي

نشتري جري السنين

والزمان كان فلهوي
[/size]

وافتكرت كمان زمان

بنت الجيران

بنت الجيران

كانت أميرة في حيّاها

بنت الجيران

الكل نفسه في قربها

شايفها لسه والضفاير جنبها

شايف عيون حور مرسومين

رسم السنين

الحلوة ذي ما سبتها

بنت الجيران الطيبين

فاكر كلامها وصمتها

فستانها والكُلفة الجميلة

عروستها حِته منها

فاكر ملامح وشّها

بنت الجيران وقت إما تطلب

كنت أنا الفارس لها

بنت الجيران ساعة ما تضحك

كل النجوم بأديا كنت بضمها

وقت إما تبكي

دمعي كان هو اللي بالل خدها

كانت تذاكر في السطوح

وكنت اذاكر في محاسن وصفها

احفظ دلعها ولعبها

أرسم جدايل شعرها

وأتريها عرفه  من زمان

صعب إني أكون أنفع لها

كانت بتسقيني الحنان

ذي ما سقتني الرضاعة أمها

بس ده الزمن الجميل

الجيران كانت تربي بعضها