نهى فهمي تصدر قطر الألم

قطر الألم
***
صدر عن دار الجندي بالقاهرة ديوان شعري بعنوان ( قطر الألم ) للشاعرة ( نهى فهمي ) وهو بالعامية المصرية وكتب له المقدمة الشاعر عاطف الجندي والذي قال عنها فى مقدمته (هي شاعرة صادقة مع نفسها تكتب من خلال ما تحسه وما تعايشه وتقدم لنا جرحها من بوحها الشعري الذي يحمل بين طياته الموهبة والقدرة على صياغة جملة شعرية جديدة )
والديوان يحتوي على ثلاثين قصيدة ويقع في ست وتسعين صفحة من القطع المتوسط ومن عناوين قصائده " اللي بنى مصر وحبة حاجات متنتورة وبحبك وعم الشبكشي ومزاد الهوى وقطر الألم وعيشتي مغيبة وياسارق منى الأحلام وأجمل شعور وقالوا عليا جنيه وأبو ولادي وبطل تمد إيدك وصبح الغرام وقلبي بيهفهف عليك.....
والديوان هو الثاني فى مشوار إصدارات الشاعرة ويدل على موهبة جيدة في الطريق سيكون لها المكان اللائق في الشعر العامي
وتقول في قصيدة بعنوان : حبة حاجات متنتورة
حبة حاجات متنتورة
فوق السرير
أوراق وجرح
وفيه حجاب
والأوضة هاديه
صغيرة
ع الأرض فيه
صورة وكتاب
وجنب منى شنطتى
لمِّيت هموم الموجوعين
حبة رسايل م الصحاب
بعد الوداع
وساعة واقفة من زمن
على وقت ما حل السفر
من يوم ما جفت
فى المدامع
ضحكتى
***
باخد وبادى ويا نفسى
فى اشتياق
واجتر من تانى الزمن
***
صوت الضمير
فارد على صوت الوجيعة
سطوته
وكأنه طلقة مدويه
ف قلب السكوت ؟!
***
وأقول لنفسى ليه كده؟!
لما انتِ مالكيش فى الهوى
بتحبى ليه؟!
وتزيدى أصل المشكلة
فادك بإيه
حَبك الدراما
والحكايات الطويلة المذهلة
مش عارفة ليه
صدَّق كلامى وضحكتى
واتشد دوغرى لسكتى
ياهل ترى
هو اللى غاوى الشعبطة
فى حبال ماليها الاشتياق
نفسه يحس العشق
ويعيش شروطه الظالمة ؟!
ولا انا اللى عارفه يمكن
الف معنى للبكا
وكيف يكون الانجذاب
***
مش عيب عليكِ
تسنى سهم الغش
انت القاتلة
طب ع العموم
يمكن يكون ف البعد
حل المشكلة
***
وامد ايدى فى شنطتى
تطلع بصورة للحبيب
و بنظره خالية م العتاب
انما فيها الرضا
وكأنه عارف
ايه ضرورة الاشتياق
ومطمئن بأنى هارجع نادمة
وأطلب رضاه
وان فعلا لما بابعد
تنعدم فيَّ الحياة
***
هالم شوقى
وجرحى من بعد الفراق
وارجع لعشقى من جديد

» دار الجندي بالقاهرة تصدر حج الحروف
» $$ تخيلات الألم$$
» مكعب الألم
» دليلة حياوي تصدر ديوانا جديدا عن دار الجندي
» مسرحية محاكمة القدر تصدر اخيراااااااااااااااااااااااااااا