شوك احتضار الحلم..الى أرواح أبنائى ساره ومريم ومحمود

الليل ستاير سوده بتغمى العيون
ياه ع السكون ..
لما الشفايف تبتسم للدنيا فى النزع الاخير
ويرفرف الطير للسما
شايل براءة عمر أخضر ..
فوق جناحين من حرير
احساس مرير ..
لما الزهور تدبل فى حضن الحزن ..
ويفارق خضار الغصن أنفاس العبير
شوك احتضار الحلم يسكن فى القلوب
ويدوب بياض الصبح فى الليل السواد
الدنيا حدوتة ميلاد ..
وخدانا جوه الذكريات ..
نحضن لعب .. فستان صغير .. بالونات
كانت بتستنى الايدين النونو تلعب بيها فى العيد الكبير
والعيد بعيد ..
عن ايد رقيقه استسلمت ..
للعجز .. للمستشفى .. لجهاز التنفس .. للمصير
ياه ع العصافير اللى قيدها الألم ..
فوق جمر أنات الوجع من قبل ما تعرف تطير
جوانا مرجيحة أمل ..
وخدانا لنجوم السما ..
وف لحظه نزلت للتراب اللى انحفر ..
جوانا قبر وعتمه مالياه الدموع
ياه ع الشموع اللى انطفت قبل السبوع
ياه ع البراءه اللى انتهت ..
ياه ع البراءة اللى اشتهت ترحل ..
وسابت حضننا خالى وسابت قلبنا ليهم.. أسير!

قصيدة بديعه
..
أنرت المكان أ/ محمد
..
اللهم إرحم جميع موتانا
وأغفر لهم