طفولة جدع

طفولة جدع
واشيل الحمل واتوكل
وباقسم بسمتى نصين
نص للصبح اللى متعاجب
ونص اعدل بيها الحاجب
-------
وبابقى بشوش فى كل وشوش
واكشر ليه مانا القاضى والحاجب
وانا المسجون ومش غاجب
وانا اللى بكتب الواجب
------------
وقعدتى فى اخرتخته
ودايما نفسى متاخده
ولامعايا رغيف وفطارو
لا حتى بتاع مصروف
--------
ودايما بابقى م الشطار
والسقفه ليه ملو كفوف
------و
باقسم بسمتى نصين
بنص اشاغل الناظر
ونص للبُقاللى مش فاطر
يادنيا ليه مالش خاطر
-------
وييجى البرد وايامه
يضيع من شبشبى حزامه
الاقى صاحبى كدا موجوع
واسأل اقول له اي الموضوع
---------
جايب لى جزمته برباط
تقولشى غازيه من سنباط
لقيت نفسى انفجرت عياط
لكن والله ما كانش عياط
------
دا كان صبر وجلد منى
واخوض فى الميه واغنى
صوابع رجلى تخاصمنى
ولا فى الدنيا يألمنى
-----
يتوه البرد وييجى ربيع
فقير لاكن مانيش للبيع
ولا باسمع كلام مهابيل
وباتمختر كدا بالليل
------
قليل البخت لاكنى
شديد الحيل
وياما دوخت وجوايا
صبر جميل
------
وباغزل الدنيا على كيفى
دا توب شتوى ودا صيفى
واخضّر زرعى بحروفى
ماتصحى يادنيا قومى شوفى
-------
واسبق كل اصحابى
ويفرح بيِّه احبابى
واتواضع مانا
م الارض دى طالع
انامن ام محرومه انا راضع
-----
وباقسم بسمتى نصين
نص لليل اللى بادعى يغور
ونص للصبح اللى جايب نور
----
وأتفائل
تجينى البهجه بعد الفجر
وميت سائل
عملت ايه ف سنين الحر
وارفع راسى للسموات
بقصه احكيها حكايات
-----
وباقسم بسمتى نصين
نص للشجر والناى
ونص لصاحبى اللى معاى
والباقى كله للى جاى