زجليه |(اربع بنات) للزجال محمد سرور

رزقنى المولى باربع بنات

رزقنى المولى باربع بنات
تهانى وفاطمه وشاديه ونجات
وطول عمرى نفسى اجيب الولد
واحقق لبويا حلمه اللى مات

بعقلى اللى راكب فرده شمال
انكد يوماتى على ام العيال
دا صبحت حياتها معايا محال
وانغوذ اضروب كمان فى البنات

تقولوا انى جاهل تقولوا حمار
دا من غير ولد ما يعمرش دار
وخلفة بينتى دا نحس وعار
بحس انى جدرى اصبح رفات

عقدت العزيمه وطفت البلد
ع اشوف بنت مهره تجيب الولد
ورحت ام هاشم طلبت المدد
وندرت ندرى انا من سكات

وقالوا ام صالح ولد وولود
ومات جوزها سالم بطلقه برود
وزينه وشابه ومهره وعود
وصالح والدها فاتها ومات

عقدت كتابى وجبت الشوار
وطلبت مطالب ودهبات ودار
وقولت لها شوفى معنديش هزار
واكره ماعندى خلف البنات

تشدى لى حليك تجيبى الصبى
يكون ولد راجل وده مطلبى
ع اشوفه بعينى ع هروح للنبى
احج ووفى الندر اللى فات

وعدت ليالى وليالى وشهور
وبحلم بولدى واسميه سرور
واقد له الموائد فى يوم الطهور
ولا حد ينادم يا ابوا البنات

وجاتنى البشاره زفت وطين
وخلفت مراتى يا بوى بنتين
يا مرى ياقهرى ع اروح انا وين
يا ريت كنت حرمه هرقع صوات

ولسمت نفسى بتوب الحريم
يا رب انت عالم بحالى ورحيم
وجانى اخوايا وعبد الرحيم
راجل كله تقوى وحافظ ايات


وقل ايه جرى لك هتحكم فى كون
دا ربك دا واهب (كون فيكون)
وهو اللى مانع وهو الحنون
وغيرك بيحلم بدفر البنات

ومرتك دا ارضك وانت البذور
هتزرع سبانخ ما تطرحش فول
متعملش راجل وسبع وغول
وتكفر بخالق سبع سموات

ارجع لربك يغفر عصاك
كله ع يغلط محدش ملاك
بنتك فى شبتك هتصبح عصاك
وسندك تداوى الالم الاهات

الزجال
محمد سرور

نائب رئيس رابطه الزجالين
وكتاب الاغانى وامين الصندوق

أخي الكريم الشاعر / محمد سرور
عمل جميل
ويناقش قضية هامة
بإسلوب جميل
في انتظار جديدك أخي دائما

جميل الطرح لمشكلة يعانى منها البعض من خلال قصيدة زجلية رائعة ولكن لا أرى هناك فرق بين الولد والبنت الكل أبنائنا واولادنا ولاندرى أيهما انفع لنا

دمت مبدعا