ابنى الغالى

ابنى الغالى
فارس
كل أحلامى البيضا
علشانك
موش هاكره حد
ولا حاظلم
ولا اخاصم ند
ولا هاتعدى فى محبتى حد
هأتحدى الريح
و نيران الحرب هاطفّيها
وهاطاطى
واتاسّف لخصيمى الخاطى
هاتحمل سخافات الأيام
واتجمل مهما ضلوعى تئن
لاجل ما تحيا
معافى من الأذى والصعب
لو أحب الاحلام وقفت ضدك
هاحدفها بعيد
مين أجمل منّك فى عيونى
أو أعظم منك
فى سطورى وكونى
روحى فى روحك ملضومة
وعيونى بشمسك مهمومة
وسعادة قلبك
صلوات الروح
وأمانى القلب
يحميك المولى من الحيرة
ويعزك بالهدى والجاه
وتعيش بشبابك متهنى
متحنى
بسعادة وحب
ابنى الغالى
فارس
كل أحلامى البيضا