مسيرة سميرة - طارق منيب

في قرية سكنها بشر مـ الغلابة
ماعرفوش ساعتها قراية وكتابة
وكان يوم وفاة زعيم رفعوا أسمه
فجابوا الجريدة وحبوا إن يقروا
لقوا الجهل حاجز وكان كله عاجز
فكلوا بيبصم شباب أو عجايز
فقالوا إن فيه بنت نٍورة وذكية
نادوها بسرعة تحل القضية
‏....................................‏
سميرة كانت مثال للذكاء
في عالم حقود أسير للغباء
جابوها وقرت الجريدة بحماس
وكانت في سن الطفولة البريئة
وسمعوها ناس وكان لسة ناس
ماسمعوش جمالها وصوت الحقيقة
فطلبوها تاني تعيد القراية
وكانت مفاجئة وقصة وحكاية
.................................
لقوها بتقرا ومن صوت دماغها
وحفظت سطور الجريدة في راسها
وقرت اللي فيها من غير ماتقرا
وكانت بداية لقصة وفكرة
قالوا بنا نابغة بتقرا وتحسب
وحيكون مصيرها إن تخبز وتحلب
وتبقى خطيئة.. في حق ضميرنا
ونقتل حقيقة.. عاشت تايهة بنا
‏.................................‏
فقاموا علموها وكان التفوق
ومع كل خطوة كان فيه تشوق
تحقق في حلم ماهواش بعيد
لحد ماجالها الخبر السعيد
تسافر وتدرس في منحة دراسية
وقالت دي فرصة وجاتلي هدية
وكان السفر بداية النهاية
ولسة حنسمع فـ أسفل حكاية
‏...............................‏
كان العم سام قاعد في انتظارها
وخدها بسلام وكانت في دارها
ودرست ونبغت.. وكشفت وصنعت
وقالت حاصنع ذرة في نحاس
وقالوا وماله دي فكرة وأساس
ثمنها رخيص.. لكنه الخسيس
طلب منها تقعد وماتسيبش بيته
فبصت وفهمت مراده وقريته
................................
قالتله يا أعمى أنا ليا بيت
وماقدرش أبداً أقول يوم نسيت
وحارجع لبيتي إرادتي حديد
وفي مصر بلدي حاكون من جديد
ماتعرفش أنه في وشة ابتسامة
وهو بيحكم ويأمر في غابة
ورد بموافقة ومع ضحكة صفرا
قال أزاي حاسبها ماواضحة الإجابة
‏................................‏
سميرة العبيطة صديقة راشيل
وراشيل دي كانت راقية إبراهيم
وطبعاً راشيل بلدها إسرائيل
ومصر وطنها عدو وأثيم
فقالت راشيل فيه فرصة كبيرة
ودعوة لندوة حتكون خطيرة
ويمكن بداية لخطة ومسيرة
ماتيجي تروحيها ياأختي سميرة
.................................
وقالت أما أروح وأشوف اللي فيها
وشافت اللي فيها .. في حادثة مريعة
كانت سيارتها ماشية بسرعة
ونط اللي سايق والنط صنعة
وقلبوها بيها.. وراحت سميرة
وراحت معاها أماني كبيرة
وفكرة خطيرة.. وخطوة منيرة
ماتبكيش معايا فيه مليون سميرة
‏........................................

[center]
القصيدة مهداة لسيرة عالمة الذرة المصرية سميرة موسى التي اغتالها الموساد في أمريكا في عام 1952 بتسهيل من الممثلة الإسرائيلية (المصرية المولد) راقية إبراهيم (راشيل إبراهام ليفي)

اخى الشاعر الجميل
طارق منيب
فعلا قصه ربما لايعرفها الكثيرون منا .
ولكن سميره ستظل رمز البنت المصريه والعقل المصرى
وسيظل الغدر والخيانه من شيمة اسرائيل التى لاتتورع ان تفعل أى شيء
فى سبيل عدم رفعة مصر أو تقدمها .
احييك على ثقافتك وقراءاتك المثيره .
مودتى وتحيتى ...

عادل عوض سند كتب:: اخى الشاعر الجميل
طارق منيب
فعلا قصه ربما لايعرفها الكثيرون منا .
ولكن سميره ستظل رمز البنت المصريه والعقل المصرى
وسيظل الغدر والخيانه من شيمة اسرائيل التى لاتتورع ان تفعل أى شيء
فى سبيل عدم رفعة مصر أو تقدمها .
احييك على ثقافتك وقراءاتك المثيره .
مودتى وتحيتى ...

أخي وأستاذي

سعيد وفخور بمرورك وتسجيل إعجابك بالقصيدة

في انتظار لقائك في العيد القادم

أخوك

طارق منيب

سلمت يمينك ياأستاذ طارق

أخى طارق
وحشنا وجودك أيها الرائع
واتمنى أن نراك قريبا فى القاهرة
أما عن القصيدة فهى رائعة كعادتك
وتختار مواضيعك بعناية
تقبل خالص ودي

منصور غيضان كتب:: سلمت يمينك ياأستاذ طارق

تسلملي يا أستاذنا الكبير .. واحشنا

عاطف الجندى كتب:: أخى طارق
وحشنا وجودك أيها الرائع
واتمنى أن نراك قريبا فى القاهرة
أما عن القصيدة فهى رائعة كعادتك
وتختار مواضيعك بعناية
تقبل خالص ودي

أخي وأستاذي عاطف

سعيد بمرورك .. ونفسي أشوفكوا جداً

ولكن الشئ الغريب إني من نوفمبر 2012 لغاية دلوقت

نزلت مصر 7 مرات ويصادف أنه مش ميعاد الندوة

المردة دي حانزل من 25-7 إلى 6-8 إن شاء الله

واتمنى أنه يكون في ميعاد الندوة

سعيد بإعجابك بالقصيدة

أخوك

طارق منيب

» مسيرة سميرة " مع تحية عطرة للشهيدة سميرة موسى"
» بيرم منيب يعارض بيرم سند "مهداه للرئيس مرسي - طارق منيب
» صعب....تشوفنى
» خطر ..قطر- طارق منيب
» هي كده.. لأ مش كده- طارق منيب