إحكى يا دنيا

يا دنيا احكى عن الأيام
وعالتوهة وعالدراويش
يادنيا تعبنا فيكى ملام
شبعنا بهدله وتلطيش
ولا محوق فى ندل كلام
ولا المرجل شبع تطبيش
ومش عارفين نعيش فى سلام
مادام هم الكبار تهبيش
وسايبه الناس تعانى الااام
وماشيه بمبدأ التطنيش
شبابنا عاش على البرشام
وفى السهره يلفوا حشيش
كبارنا تاهوا م الإعلام
بقينا عباره عن حرافيش
ماهش فارقه حلال وحرام
خلاص اليك زى الشيش
.
يا دنيا احكى عن الفلاح
عن القطن اللى كان عزه
عن اللى بيصحى كل صباح
يراعى البقرة والمعزة
عن القمح اللى كان تصدير
بقا دلوقتى لا مؤاخذه
شوية أكل للعصافير
وعوادنا صبح عزه
.
يا دنيا احكى عن التعليم
وعالكتاب وعالهيبه
عن النشء اللى عاشها سليم
وكان بيخاف من العيبه
وعن دلوقتى لو تحكى
تلاقى الحال بقا مصيبه
عيال تضرب اساتذتها
ويا الأستاذ جتك خيبه
.
يادنيا احكى عن التجار
وعالكلمه اللى كانت سيف
عن البركة اللى بالقنطار
وراحت مننا بالزيف
عن السرقه فى عز نهار
وكدب وغش لاجل رغيف
عن الحاجزين مكان فى النار
ولابسين لبس تقوى عفيف
.
يادنيا إحكى وعلى القول
وخلى الكل يتكلم
عن القاتل وعالمقتول
وعالعايش بيتألم
عن الحق الحق اللى بات مغلول
وعالظلم اللى بيعلم
عن الشعب اللى عاش بالفول
وغصب عنه بيسلم
عن الوسطى اللى قالو فلول
وعن إرهابى قال مسلم
وعن مسلم صبح مزهول
وشاف الدم بيعلم
يادنيا كفايه مش معقول
يادنيا رقصنا عالسلم
يادنيا رقصنا عالسلم

   

جميلة جدا جدا جدا
يسعدني ان اكون صاحب اول تعليق
دام ابداعك يا فنان

أخي العزيز الشاعر / أحما عطا
قرأتها بمجرد نشرك لها
واستمتعت بها
خاتمة قوية
في انتظار جديدك أخي

أحسنت شاعرنا الراقي
لا فض فوك
دمت بخير

يعسوب الشعر العربي
أ . عاطف الجندى
سعدت بمرورك المميز
ودمت بخير

اخي الشاعر الرائع سلمت يمينك نص رائع ... دمت بكل ود

ماهش فارقه حلال وحرام
خلاص اليك زى الشيش


النص جميل يا شاعر واقعي باسلوب جميل