هاغنيلك ...

حبيبتي .....
يا ست الحسن
انا اللي من نظرة
عينيكي بتوه
وانا اللي ف عسل
الشفايف دايب دوب
وانا اللي ع صدرك
ببيع همي وبفرش حلمي
واروح ف النوم
حبيبتي .....
يا حور العين
انا العاشق لروح روحك
وانا السارح ف تكوينك
انا اللي كتبت عنواني
حروف اسمك
وسكني جوه احضانك
حبيبتي .....
يا طعم الشمس
انا بكرة هاغنيلك
بصوت كروان
ونور الصبح
بيشقشق
وهارسم ع السما
بسمة
عشان تكوني مبتسمة
حبيبتي ......
امتى القاكي
وحلمي بيكي يتحقق
يا كل املي ف الدنيا
يا ضي عينيا من جوا
يا امنية وكل اماني لياليا
حبيبتي .....
امتى هاتجيني
واعيش مرتاح