"تحرش جماعى"

موضوع: "تحرش جماعى" الأربعاء أبريل 02, 2014 9:28 pm

"تحرش جماعى"

بلاش يابن بَطنى . . ما تِلويش دِراعى
جُحُودَك غضبنى . . و أجِّج صراعى
يا قاتل شِقيقك . . يا قاطِع طريقك

يا لامِم عَليَّا الكلاب و الأفاعى
شريعة دى ولَّلا "تحرش جماعى"

مِشمَّر كُمامك و عامِل لى جَلَبة
و داير تِجرَّسنى وِسط الأحبة
مشايخ بِجِبَّة . . عُقول نًص لِبَّة
إهانة و مَسَبَّة بدون أو بداعى

أساتذة و طَلَبة . . و إضراب أطِّبا
و نُشَطا . . و نُخبة . . يا فاهم يا واعى
سياسة دى ولَّلا "تحرش جماعى"

حَكَمنى المِوالى و حرامى الغسيل
و جه بَعْدُه خاين بِجَهلُه و عَميل
تاخُدنى بذنوبهم بِدال ما تحاسبهم
دى آخرة رِبايتى . . و رد الجميل !
بجهلك و فكرك تِسَمِّم نخاعى

ياريت فيه مِرايا تِشوف شَكلى فيها
حاتِلقاك مِشَخْبَط ملامحى و خافيها
في حُزنى و سوادى . . يا دافِن ولادى
أخلَّص ضفايرى تقَفِّش فِخادى

يا تملك سفينتى يا تِحْرَق شراعى ؟
دى ثورة دى ولَّلا "تحرش جماعى"

تِمزَّق عليَّا إللى فاضْ من هدومى
بِدال ماتواسينى و تِحمِل همومى
و تِهْدِرْ كرامتى بإسم الكرامة
و تاكل و تِشبع . . و بتقول لى صومى
عشان خاطر أندم و اعَضْعَضْ صُباعى

ماحدش مِعوِّل على البيه ضميرك
مادام فيه مِمَوِّل . . حاتِعلِن نفيرك
و ترفع رايتهم . . و تِسْعى لغايتهم
و حاتعيش يا فارس في حِدوة حِميرك
و يوم لما تسقط . . حاقول مش بتاعى

يا سانن سيوفهم . . قديمة وغلاوتك
يا ناطق حروفهم و سايق غباوتك
حاتغسل هدومك و تتوضى تانى
و تقعد تفاوض و تنكر عداوتك

مساء المصالحة . . و أحلى المساعى
عليك ياللى ناوى و ضامر خداعى
على أُمة شِبْعِتْ تحرش جماعى

موضوع: رد: "تحرش جماعى" الخميس أبريل 03, 2014 4:53 am

أخي العزيز الشاعر / حسن العربي
عمل جميل أخي
وإن كنت أختلف مع فكرته
إلا أنك أجدت بحرفيه عاليه
ايضاح رأيك
ولكن يطرح السؤال نفسه
إن كان ما يحدث الآن هو تحرش جماعي
فما تسمية ما حدث في ثورة يناير ؟
---

اخى الشاعر الجميل
حسن العربى
نص بصراحه فى منتهى الجمال والروعه
وانت كتبته بمهارة عاليه واستخدمت البحر المتقارب
بمنتهى الدقه والبراعه . فخرج نص كامل متكامل .
احييك واشد على يدك على هذا النص الرائع .
مودتى وتحيتى ...

تِهْدِرْ كرامتى بإسم الكرامة
و تاكل و تِشبع . . و بتقول لى صومى
عشان خاطر أندم و اعَضْعَضْ صُباعى

هذا وصف دقيق أيها الشاعر الرائع المتمكن من شعره ويملك ناصية

الحرف جيدا ...

يا سيدي أعجبتني القصيدة شعرا وصياغة

أما فكرا فأختلف مع بعض ما أثارته ..

سيكتب التاريخ يوما ان ما يحدث فقط لصالح الكيان الصهيوني

لا يمكن بأي حال من الاحوال ان يستفيد مما يحدث الان

الا ثلاثة لا رابع لهما

إسرائيل ... الدولة العميقة كلها .. من يريدون تقسيم مصر

دعونا نفيق قبل فوات الاون

أحييك علي نص جميل ،، اتفق مع كثير من أفكاره وأختلف ايضا

لك كل الود والتقدير

النص للتثبيت بواسطتى
تقديرا للشعر والشاعر ...

» حالة تحرش
» افطار جماعى لاعضاء المنتدى