قصيدة :قص ولصق

علمت ابني لعبة جميلة

إسمها لعبة قص ولصق

جبنا اللعبة وجينا نلعبها

لعبتنا مش لعبة وبس

بتعلمنا كلام ومعاني

والمعرفة تنفعنا يوماتي

إنبي رسم شمس وشكلها

رمز حضارة مصر بلدنا

ورسمت الصحرا بلون أخضر

أملي ف يوم تكتر زرعتها

وشبابنا يزرع ويكافح

يبقى ما فيش ف حياتنا بطالة

إبني اتبسم قال لي ياريت

عايزين نرجع زي زمان

والحب يكون هو طريقنا

للعالم ماهو دا الإسلام

لكن لما نلاقي تعدي

قلب الواحد منا جسور

قلت له ياالله نعود للعبة

كمل قل لي ها ترسم إيه؟

ها ارسم صحوه لبكره جميلة

بدماء كل الشهدا في مصر

واما الحق يروح لاصحابه

يرتاح كل شهيد في مكانه

قلت له يا ابني دا حلم جميل

دوري عشان أجاريك في اللعبة

ها ارسم كل سمانا نجوم

علشان نعطي الصفحة بريق

دول كل ابطالنا الأحرار

في العلم وكل الميادين

إبني قلب لي الصفحة وقال لي

ها نكمل علي صفحة جديدة

وارسم فيها زهرة لوتس

رمز تاريخ المصريين

نفتكر الماضي وأمجاده

قبلها كنت رسمت النيل

قلت له شاطر يا ابني يا غالي

في اللعبة ما يتخافش عليك

ها نسيب دلوقتي اللعبة دي

ونروح علشان نبني بلدنا

واما ها نتعب نلعب تاني

نرجع تاني لسحر اللعبة

نتعلم والعلم مفيد.