بتصدنى

الثورة
بتصدنى
تأمرنى إنى انحنى
لاجل اكتمال الحلم فيها
الله عليها
رغم اختلاف الازمنة لساهها
برضو مؤمنة بنفس الصفات
كل اللى فات
30 سنة واربع سنين
وحلم م الزمن الحزين ودموع
بتتجمد على طرف السرير
وبقايا طير بس انجرح
الخوف سرح من جسمها
كتفنى فى مكانى هنا
من حقنا لما الامانى الممكنة
متكونش ابدا ممكنة
نغضب ونتمردعليها
من حقنا لما الالم يكوينا وندوق المرار
ميكونش فى النار حلنا
امبارح اتعلمت درس مهنسهوش
وسط الوشوش
ممكن نلاقى حد يشبهنا اوى
لكن صفاتنا تختلف
المستقيم كان الألف
وعشان كدة اصبح مقدمة الحروف
الخوف ملينة بس بنلوم ع الظروف
ومن الكسوف بنقول سلامنا انتصار
وفقا لتصريح الكبار
عجبى على بلد الحضارة
والشطارة والكرم
عجبى على شكل الهرم
رمز الشموخ
عجبى على صمت الشيوخ
ازاى تسبح للصنم
وازاى بتسجد لما تتداس بالنعال
مين اللى قال العمر غالى
العمر غالى لما يبقى صوتنا عالى
والعمر ارخص م التراب
لما نركع للكلاب
ومع الأسف مش عارف
اتخيل خلاص شكل الخلاص
الصورة باهتة والملامح مش أكيدة
مصر الوحيدة
اللى اتقتل جواها ثورة
بس هتقوم الف ثورة
علشان منقبلش لبلدنا تبقى عورة
جوا انظار البشر
شكرا لأنى مش زعيمكو المنتظر
يسقط مبارك تحت اقدام الشعوب
يسقط اله الظلم والخوف والكروب
يسقط نظيف يسقط شريف
يسقط حبيب الظلم سفاح الالوف
وتعيش بلدنا رافعة راسها للسما
وانا من هنا بعلن بإنى
الرافض الاول لحزب الديكتاتور
ومن التلات الجاى
انا قررت اثور ويأما اعيش فى النور
يأما احسنلى اغور
25/1/2011

تنقل للعامية وتشترك فى مسابقة فبراير
تلبية لرغبة الشاعر
خالص ودي

أخي الكريم الشاعر / أدم
أسلوب جميل
وعمل جميل إستمتعت به
في انتظار جديدك