مصر جايَّة

موضوع: مصر جايَّة الخميس يناير 09, 2014 9:01 pm

مصر جايَّة

رافعة راسها . . غَصْب عن عين إللى جابكو
مصر جايَّة
وِسط ناسها . . و الحِبال حوالين رِقابكو
مصر جايَّة
و بمداسها . . تِعلا . . و تْكَمِّم كلابكو
مصر جايَّة . .

* * * * * *

شادَّة حيلها . . راكبة خيلها
بعد ما شِقيِّيت عليكو . . و كِرْهِت العيشة بسببكو

حاضنة نيلها . . رافعة ديلها
خايفة م الدم ف إيديكو . . و النجاسة إللى ف جِرابكو

ياللا يا ناكرين جِمِيلها . . عيشوا فيها . . و بأدبكو
مصر جايَّة

* * * * * *

لابسة طَرحة أو جونيللا
بِ كرافَّات أو بالفانلة . . مصر جاية

ساكنة عِشَّة أو في فيللا
راكبة توك توك . . أو تيريللا . . مصر جاية

جايبة وصفة لكل عِلَّة
فاتحة قلب لكل مِلَّة . . مصر جاية

جاية تِدِّيكو ف جنابكو
غَصْبْ عن عين إللى جابكو . . مصر جايَّة

* * * * * *

إرجعوا تانى الجحور
و إكتبوا عالضلمة . . "نور"
إحلَموا بمُلْكْ و قصور

و إقفلوا عالوَهم بابكو
غَصْب عن عين إللى جابكو . . مصر جايَّة
* * * * * *
مصر جايَّة . . حتى لو تِعْبِت شوية
مصر جايَّة . . حتى لو نِعْسِت شوية
خُد نفسها . . و إحبسه ف صِدرك شوية

تلقى جوز عُـكَّـاز . . بيطلع له جناحين
تلقى عود القش . . نَبِّت فلاحين
و الأعادى فيها . . يبقو مداحين

يحفظوا ترابها إللى أغلى من دهبكو
غَصْب عن عين إللى جابكو . . مصر جايَّة

* * * * * *

مصر جايَّة . . حتى لو وقفت شوية
مصر جايَّة . . حتى لو غابت شوية
خُد نَفَسْها . . و إحبسه ف صدرك شوية

التروس بعد الصدا . . تِعْرَق زيوت
في الإيدين . . المَسْتَرين ينضَح بيوت
و ف حِماها تحب عيشتك مش تموت

حِسُّوا . . لاجل عيون شبابكو
غصب عن عين إللى جابكو . . مصر جايَّة

* * * * * *

مصر جايَّة
بس أحلى ألف مرة
حلوة جوَّه . . زى برَّه
دين حَقيقى . . موش مُتاجرة

دى إللى مذكورة ف كتابكو
غصب عن عين إللى جابكو . . مصر جايَّة

مصر جايَّة

موضوع: رد: مصر جايَّة الجمعة يناير 10, 2014 7:53 am

إن شاء الله يا حسن ولو الصورة لمن
والكاف ما فهمت عليييك بالواو إنسجن
والحروف عمرها ما تقبل أوجاع و نن
فبعثريها الطبيعة تعطيك الفن بما ء سن.
***
تحياتي لأمل الأمة الذي كااااان يوزن.

موضوع: رد: مصر جايَّة الجمعة يناير 10, 2014 12:47 pm

المنداوي راسم كتب:: إن شاء الله يا حسن ولو الصورة لمن
والكاف ما فهمت عليييك بالواو إنسجن
والحروف عمرها ما تقبل أوجاع و نن
فبعثريها الطبيعة تعطيك الفن بما ء سن.
***
تحياتي لأمل الأمة الذي كااااان يوزن.

تحياتى لك و شكراً جزيلاً

الله عليك يا شاعر الله
اخى الشاعر الجميل
حسن العربى
والله تبكيت راقى .. وكلام للى يفهم .
تسلم ايدك يا شاعر .
مودتى وتحيتى ..

موضوع: رد: مصر جايَّة الخميس يناير 23, 2014 12:33 pm

عادل عوض سند كتب:: الله عليك يا شاعر الله
اخى الشاعر الجميل
حسن العربى
والله تبكيت راقى .. وكلام للى يفهم .
تسلم ايدك يا شاعر .
مودتى وتحيتى ..

الأخ العزيز و الشاعر الجميل الأستاذ "عادل سند"
أشكر لك مرورك و إعجابك بكلمات لا تعبر بما يكفى عن إختلاط مشاعر الغضب و الأمل و الرغبة فى التسامح.
مع خالص تقديرى لك, و دعواتى لمصر بالتعافى.

أخى حسن
جميل ما قرأت أيها الراقي
كنت هنا وسعيد بما قرأت
خالص ودي

أستاذ عاطف الجندى , أشكرك شكراً جزيلاً على مرورك و على كلماتك
خالص إحترامى

موضوع: رد: مصر جايَّة السبت فبراير 15, 2014 11:19 am

النص للتثبيت بواسطتى
تقديرا للشعر والشاعر ..

موضوع: رد: مصر جايَّة الأحد فبراير 16, 2014 2:37 pm

الأستاذ الشاعر "عادل سند"
أشكرك شكراً جزيلاً على تثبيت عملى المتواضع فى حب مصر ,
و ثبتك الله فى الشدائد على الحق و الخير.
مع وافر التحية و الإحترام

احساس جميل ومعانى ولا اروع احسنت