مساجلة من فن الواو بين مصطفى هاشم والأديبة هناء جودة

مساجلة شعرية من فن الواو

بين الشاعر مصطفى هاشم والأدبية الشاعرة هناء جودة

بمركز رامتان الثقافي بمتحف عميد الأدب العربي د/ طه حسين بالقاهرة

في ذكرى شيخ شعراء الصعيد عبد المجيد فرغلي بتاريخ

2011/12/11

بحضور نخبة من شعراء وأدباء مصر والعالم العربي

البداية

▬▬▬▬▬▬▬▬▬▬

وقبلت منــــــــك تحــــديكِ
لا تقولي ده صعيدي خايف
وأديني جيتـــــــــك لحديكِ
والكــل لنزالنــا شـــــايف
........

▬▬▬▬▬▬▬▬▬▬

من قبل ما تيجي يا مغرور
وانا كنت عامله حسابك
ما الـــشعر يامــا بيغـُـــر
وغروره هوا اللى صـابك
........

▬▬▬▬▬▬▬▬▬▬

انتِ اللى قولتي تعال
والفيس بيشهد عليكِ
وكفــــــــاية مكر وتعال
الدعوة لسه في ايديكِ
........

▬▬▬▬▬▬▬▬▬▬

الدعوة دي دعوة احباب
مش مكر غيظ او تحدي
بالحب فتحـــت لك باب
سمي وصلي وعـــدي
........

▬▬▬▬▬▬▬▬▬▬

أنا الصقر قالـــــوا عليا
وعرفوني بحري وقبلي
ان كنتِ بالود جــــايه
لابد تنسي اللى قبلي
........

▬▬▬▬▬▬▬▬▬▬
عاشق و القلب صافى
ولا حد قبلك في بالي
لو كنت ناوي التصافي
قـــــــرب وبلاش تبالي
........

▬▬▬▬▬▬▬▬▬▬

كم مرة اقولك تعالي
يا هنــــاء كفاية غرور
وكفــــاية كبر وتعالي
ماسمعش غير بس غور
........

▬▬▬▬▬▬▬▬▬▬
دانا كنت أهـــزر معاك
عرفـاك عنيد وجسور
ولا انت حبكت معـاك
وزعلت من بس غــور

▬▬▬▬▬▬▬▬▬▬
سامحيني يا بنت الاصول
خيبتي الظـــــــــن فيكِ
العام فيه اربع فصول
وانا عمري فصلته ليكِ
........

▬▬▬▬▬▬▬▬▬▬
فرشت لك رمشى تصلى
قلت لى هتـــــــوضا تانى
معرفش انا ايه حصل لى
من نظرة رمشك سبانى
........

▬▬▬▬▬▬▬▬▬▬
في رموشى قبلك بنات
من نظـــرة رمشي سباها
بس النوبادي بالــــــذات
انا تـُهـت وحـــدي في سماها
........

▬▬▬▬▬▬▬▬▬▬
عشقت شاعر و مشهور
لكن عيـــــــونه شاريده
وعزولى راح يبات مقهور
لما اقــــوله شاريـــ ده
........

▬▬▬▬▬▬▬▬▬▬
يا هناء كلامك عجبني
وكأنه من شعر شوقي
وجمـــال حروفك جزبني
لخبطلي قلبي مع شوقى
........

▬▬▬▬▬▬▬▬▬▬
البنت حلــــوة وشقــرا
بتقـول عشقت أنا شاعر
وهو اللى عامل بيقـــرا
مشغول بيغزل مشاعر
........

▬▬▬▬▬▬▬▬▬▬
على فين قوليلي راحين
عشان اعرف امشى معاكِ
وافرشلك الدنيا رايحــــــين
ولا انتِ راميــــــة بلاكِ
........

▬▬▬▬▬▬▬▬▬▬
اعشق براحتك و شَكِلْ
للبيـــضه و السمرا ميل
حـــــلو الغرام المشكل
بكـــــــــره تقع يا جميل
........

▬▬▬▬▬▬▬▬▬▬

هناء قالتلي هتــــــوقع
حتى ولو كنت شاطر
ماتعرفش إني مُــــوقع
ألفين هناء في المخاطر
........

▬▬▬▬▬▬▬▬▬▬
بحر الصبـــــــايا غويط
ياللى انت غاوى تعومه
بس اوعى قلبك يشيط
لو سبته يغرق في نومه
........

▬▬▬▬▬▬▬▬▬▬
بحر الصـــــــبايا دا كداب
ولا عمــــــره للسر حافظ
فيــه ياما تاهــت أحـــباب
حتى اسألي عمي حافظ ....

.( التاقد الكبير عبد الحافظ متولي رئيس المهرجان وقتها )
........

▬▬▬▬▬▬▬▬▬▬
طلبت تسبح في بحري
وهناء بحـــــورها غويطة
وايش جاب قبلي لبحري
وخيفاها تخـــــتم بعيطه
........

▬▬▬▬▬▬▬▬▬▬
قبلي النجـــوم والشمس
على الراس تبعد بشبرين
وبحري مفيش غير الهمس
وهناء وشوشو وشـــــرين

........

▬▬▬▬▬▬▬▬▬▬
طيـــب تعالى سامحني
وبالــــود راح أمـد إيــدي
وكفاية لــــوم وصارحني
واكتب رسالة ف بــريدي
........

▬▬▬▬▬▬▬▬▬▬
قالت سامحنى وصارحني
لاحسن هيشمتوا فيــنا
يا هنـــــاء كلام جرحنـــي
لكن سمـــاح اكتفينــــــا
........

جميل يا شاعر والله
أحسنت وياريت تيجى أنت وهناء ندوتنا الجاية يوم السبت
11 يناير فى اتحاد الكتاب هنسعد بكما ونستمع للمساجلة
خالص ودي

لا حاجة جميلة بجد
تناغم وابداع وروعة
دام الشعر والشعراء
ودام الابداع

مساجلة رائعة
غردت معكما الحروف
الشاعر / مصطفى هاشم -- الشاعرة هناء جودة
سلمت حروفكما معا
تقديري لكما
المنى

الله ينور عليكم
مساجله فى منتهى الروعه والجمال .
شكرا اخى مصطفى والشاعره المتالقه هناء جوده .
تحياتى لكما ..

شاعرنا القدير الأستاذ / عاطف الجندي

أرجو من الله أن تتاح لي الفرصة في القريب العاجل

بالحضور فأنا كمــا تعلم الآن مقيم بالصعيد

وأنقل لك بالمناسبة تحيات كل أصدقائك من شعراء قنا

دمت بخير وشكراً لدعوتكم الكريمة

» نهلة . شعر مصطفى هاشم
» كوم جـابر . شعر مصطفى هاشم
» رابط مساجلة فن الواو للشاعرين حسين السوهاجى وجابرالزهيرى
» شرطة مصر . شعر مصطفى هاشم
» كوم جـابر . شعر مصطفى هاشم