ناشط سياسي

ناشط سياسي..
سعدالشرقاوى

دى لعبة كراسي
فى مجلس رياسي
تعوزك مفتـّح
وناشط سياسي
,,
يا صايع يا فاضى
يا سارق أراضي
وقاعد قصادي
بتوجع فى راسي
,,
بترغي بغلاسة
وجاهل سياسة
وعندك شراسة
مبجّح وقاسي
,,
يا قابض يا طامع
لصاحب مطامع
يا فاقد ولامع
يا شارب وناسي
,,
يا شاهد فى باطل
يا خايب يا عاطل
يا سارق يا قاتل
يا تركي وحماسي
,,
يا عامل شريف
وعقلك خفيف
يا ريتك نضيف
وفاهم وراسي
,,
عميل امريكاني
يقول عن لساني
وياخد مكاني
فى صدر الكراسي
,,
مفوّض علينا
يا كلب الجنينة
وعامل حامينا
وراسك براسي
,,
يا ضايع فى سهرة
ونفسك فى شـُهرة
وماشى ف مظاهرة
تمثل مداسي
,,
يا خارب بلدنا
وتالف ولادنا
وايه اللي فادنا
فى لم النواصي
,,
فى عرض اللي جابك
تريّح جنابك
ووفـّر خرابك
يا ناشط سياسي

الله ينور اخى سعد
كلمات جاءت مصيبة تماماّ .
راقنى نصك للثماله .
مودتى وتحيتى ...