كــان زمـــــان

ياريت دامت

قاعدة زمان

تحت الشجر

فــ حضن الأرض الطيبه

وضفاير شجر الصفصاف

مابينها ضى القمر

فارش على مطرحنا

عنقود م الأمل

والحب مادد حروفه

على مدى الشوف

بحر م الآمـــان

مايعرف خوف

والشط معلوم المكان

واللُقمه ومهما يكون الغموس

تِسرى فــ النفوس

ذى متقول دوا

مصروف من حكيم الزمان

والشاى ع الجمر إستوى

ويا الكلام

وإن كان دخانه بيعبى الهدوم

وع الوش باين لَسْعِته
ِ
ويطير منه الحَمام

شويه منك تِجلى الهموم

ويزيح معاها التعب

والفكر فــ المقسوم

زمان ماحد فينا إتجرح

الضحكه فوق الشفايف

يسمعها القلب ينشرح

الفَرْح فوق الوشوش

بيقول كلام

يحلى المكان

ذى طُهر الندى

على أوراق الشجر

بيسرسب حنان

الله على قاعدة زمان

ورغم اللى كان

من شقانا وبؤسِنا

فوق الملامح

من قساوة مِــرنا

بس الأكاده فــ طبعنا

مرسوم عليه

حروف الأمـــل

وحب العمل

والحلم بكرا هــ يتولد

بين خطاوى الولد

وآه ياأيام الزمن

ياليل معبى غيوم

عدى على لحظة هوى

واخدها معاه للمجهول

فارش عليها حبة قلق

حلم الصبى من زمان

مرسوم معاه ع الورق

والدرب مليان بالحُفَر

وجنبها سكة سفر

قالت وداع لقاعدة سَمر

والشاى ع الجمر

إستوى

شاعرنا الجميل / محمد عبد الواحد

يروق لى دائما مرورك

وأن نستمتع دائما بتعليقاتك الجميلة

دمت لنا رائعاً

نص مميز اخي طاهر
ودوام الحال من المحال

ودي وتقديري ياصديفي

اخى الشاعر عصام سامى ناجى

يشرفنى مرورك وشكرا على تقديرك للعمل

ولا حرمنا الله منك ومن قلمك المتميز

شاعرنا الكبير / عادل سند

لمرورك على العمل وثنائك عليه له طعم خاص

لاحرمنا الله من ذلك مع تحياتى وتقديرى

أخى الشاعر / عبد العزيز المنسوب

الرائع هو مرورك على صفحتى بالمنتدى

لاحرمنا الله من طلتك الجميلة

دمت بكل ماتحبه وترضاه