جنونيات ...

موضوع: جنونيات ... السبت نوفمبر 16, 2013 3:58 am

1
مجنون ...
ولا انت مشتاقُه
حزنك غويط وجنونّا ترياقُه
قلبك مسافر للقلق دوغري
الضحك يغري الوطن
يرمي لنا سرّاقُه
2
ومتلقهوش ....
لما القلوب تفضي
الحلم مش للبيع لا بماس ولابفضه
الحلم طاسة جنون
تحميك من الخضة
3
السكة مش باتساع الخطوة والشوفة
السكة نظرة وداع م الحزن مطروفه
لو كنت راجل شجاع إلبس جنونك يوم
كسر هموم سكتك .....
تلقاها مكشوفه
..
4
لسه الحياه .........شبابيكها مقفولة
الهم أقرب وطن .....بينبّت الفولة
لو كان جنونك سكن
كات الحياه تلقاك ...
وايديها مغلولة
...
5
ال ..طظ ..كلمة قلق
مبتختصرش حديث
دايما بتفتح نفق ويوماتي فيه تحديث
يكشف خبايا الألم وجنون وديع جواك
نص الكلام مسألة ...
مشغولة بالتلخيص
6
البحر وسع الفضا ...
ويا الجنون بيضيق
جرب فروض الرضا واتملا بالتصديق
هتلاقي كل الجبال رهن انفعال الروح
كل الجروح والألم ...
معجونة بالتلفيق
...
7
....
الخلق دايرة ملل الحزن مركزها
والفرح نقطة عسل بيقل تركيزها
أصل الزمان مغشوش
بالدم والمية
كل الأماني فاشوش....
فالحين نبروّزها
8
...
الكدب طور للبشر...
بيعدّوا فيه إلا....
حبة بشر مساكين ومحسوبين قله
الصدق منجة طريق ...لو خالي منه الخوف
كل الظروف بتشوف
وتحب تتسلي
9
...
متعلقيش ع الصوّر
خوفا ايديكي تبوظ
متعلقيش ع البشر دور البشر أراجوز
كل المسائل غلط والصح ف إيديكي
بأمانة ترميلنا ...
أحزان بطعم اللوز
10
...
لسه الوطن مفتوح
للدم ع الأخر
لسه طريق الروح ..بالوهم بيفاخر
ماشيه ف طريق قوّال فرحانه بالترحال
يام السنين خلخال
ولدانا ليه ...
باكر

11
...
يا عرضنا الحصري
كل الجوايز ليك
مبيكفناش حصري ولا شمسنا ترضيك
مانت اللي عاشق ليل
كل المداين شتا ...حلمك حياه ملفته
إحلم ...
بهز ايديك
12
...
الحزن رحلة بطل
بيحارب الطواحين
أصل انتفاء الخجل من عادة العايشين
طول مالدما مصلحة يا حلاوة الرحرحة
دي السكة لو مربحة
يا كترة السالكين
13
...
للعند كفر إتولد
والبشري للأوجاع
دا الكره فيه اتسند والحزن بيه اتباع
يا تابعين عِندكم فجر الأمم عَندكم
بيطل من أرضكم
ميت مالوش أتباع
14
...
الجمع ضد الوطن
أصل الوطن مشبوح
مربوط في خيط البدن مممسوخة فيه الروح
الفرق في الدبابير فالقسمة حسب الهوي
مين اللي عنده الدوي
لما الأمان بيروح
15
...
عدي النهار وانطفي
في العتمة قنديله
كان قلبنا اللي اصطفي يشرب قيود ليله
دي القصة مش حواديت ولا حمل جنيه
القصة حلم كبير تايهين ....
ف تأويله
16
...
ويا صوت يا ضد الغلط
بتحارب التشويش
السكة بالعة الزلط وبتعترف بالعيش
كبّرت حلم الندي مهما القلق بيقول
طالع كلامك ورق ...
محروق مبيدفيش
17
...
يا مكمم الحواديت
كمم شعاع النور
وادي لغناوي البيت تأشيرة م المأمور
أرسم لصوت الناس فوق الوشوش ترباس
خلي الطريق متراس
جايز يحوشك ...
سور
18
...
التهمة مسبوكة
منتظرة بس غريق
ماهي قصة محبوكة بتكمل التحقيق
والرأي صيدهُ بسيط حبة غني وتنطيط
أما اللي صوته غويط
هيجرب التشويق
19
...
الفرح مش تصوير
ولا رسمتين ع الوش
الفرح سطر كبير فيه الحياه بتكش
تدخل مابين حرفين ونعيشها ف دقيقتين
الفرح لو حلمين
يحضن مابينهم عش
20
...
لسه الوطن تعريف
محجوز علي النخبة
كلمة بدون تصريف مهما التقت صحبة
مجموعة م البراويز علي سكتين دهاليز
مع شرط للتعجيز
راح تكمل اللعبة
21
....
أكبر أماني القلق
يرتاحله لو ساعه
الهم نص الغرق أصنافه خداعه
دوّر تلاقي صنوف من همهمات الجوف
الحلم مش مألوف
أوطانه متباعه
22
...
كلام مهجور مبيهزش....
متلجألوش
كلام براني ومدشدش ...متسحبهوش
وسيبه ف دنيا رداحة قلوب الخلق نواحه
وعايزة الحرف بالراحه
متحدفهوش
23
...
عيان بإيه
يا عدل مش واضح
عيب في الشخوص ولا القانون سارح
معووج ف أرض بتعترف بالليل
ساكن جيوب السلطة بالتأويل
وياعين ...يا ليل وياها
بنكافح
24
...
ظابط ايقاع
الخطوة ع الدوران
ماسك إيداع الحلم للسجان
طابع وشوش بتبرر الأحزان
وبرغم دا فيه ناس كتيييير
بتقول عليك
انسان..!!!
25
...
مسكونة دنيتنا
بعبيد واصنامها
ميحركوش خطوة غير أمر قدامها
نظرة ف طريق العقل مش موجود
فإذاي نعود وأًصنام كتييير
بتلاقي خدامها
26
...
ضد الغياب...
مبقاش حضور
ضد -الغياب - وقفة شعور
بتثبّتك وسط الطريق وتطمنك تفضل برئ
بتوشوش الكون الطليق
وتعلمك فيه المرور
27
...
الوطن عامل حيادي
والسكك بين حادي بادي
الفرح لحظة هزيمة الأمل سكة جريمة
والقلق ابن اللئيمة عرفوه
ضحكة بلادي
28
...
عقول صلصال قلوب خروع
وشوش مركونة ع الأرفف بتتمطع
وطن تشويش سكن تهميش
بدن تلطيش ....
بيتوزع
29
...
سكونك موات
جنونك.....شتات
بيبان الحقايق حارسها السكات
بتفتح عيونك ....طريقك يخونك
شجونك مجرد بواقي
عادات
....

موضوع: رد: جنونيات ... السبت نوفمبر 16, 2013 9:18 am

بالأمانة قرأت لغاية رقم 7

وعجبتني جداً

ولي عودة لاستكمالها ياشاعرنا الكبير

موضوع: رد: جنونيات ... السبت نوفمبر 16, 2013 1:00 pm

أخي العزيز الشاعر / طارق منيب
شاكر لك أخي مرورك وتعليقك
أعلم انها طويلة شويتين
لاني كتبتها علي فترات متباعده
رقمتها ليسهل علي من يرغب في قرائتها ان ينتهي وقتما يرغب
في انتظار قرائتك للبقية أخي
وأتمني أن أستحق كلمة شاعرنا الكبير

اخى الشاعر
عماد عبد الحكيم
مقاطع جميله بالفعل .
وان كنت اتمنى لو نشرتها على حلقات .
حتى يستمتع القاريء .
فالشعر ليس بالكم .. وإنما بالكيف .
سعدت بقراءتى وتقبل مودتى ..

أستاذي العزيز الشاعر / عادل عوض سند
شاكر لك كلماتك أستاذي
وأتمني أن أستحقها
كنت قد نشرتها في منتدي أخر علي أربعة أجزاء
لكني قررت هنا أن أنشرها كاملة
ومع ترقيم المقاطع ..( للقارئ أن يتوقف متي يشاء )
ويتابع بعدها إن كان يرغب في المتابعة
أو يغلق الصفحة ويندم علي الدقائق التي أضاعها هنا Very Happy

شاكر لك أستاذي كلماتك مرة أخري
وأتمني أن أستحقها

عندك حق .
وآسف .

أستاذي العزيز الشاعر / عادل عوض سند
لم أخمن أن جملتي ستفهم خطأ بأني
أقلل من رأيك أو شئ من هذا القبيل لا سمح الله
لكني كتبتها من قبيل تلطيف الحديث لا أكثر ...
ولم أكن أقصدك أستاذي بأخر جملة في ردي ويعلم الله ذلك
عامة
انرت المكان أستاذي للمرة الثانية
في انتظار مرورك دائما

الفنون جنون

حقا انها جنونيات

دام الابداع

مبدع أستاذ
مساء النور والشعر ... وصباحه كمان

موضوع: رد: جنونيات ... الخميس نوفمبر 21, 2013 4:02 pm

الشاعر المبدع / عماد عبدالحكيم
نص أكثر من رائع يسجل واقعنا بحرفية عالية

تحياتي وتقديري

اللهم رد كيد الظالمين في نحورهم أيا كانوا وحيثما وجدوا

اللهم من قتل مصريا ظلما فاقتله شر قتلة وأرنا فيه عجائب قدرتك

موضوع: رد: جنونيات ... الأحد ديسمبر 08, 2013 12:03 pm

الأعزاء
***
أخي العزيز الشاعر / أحمد رجب و أخي العزيز الشاعر /مصطفي محمد وأخي العزيز الشاعر /عبد العزيز المنسوب
متشكر علي كلامكم
واتمني أستحقه