المسح على حيط المقام

ياليل أخير

يا ليل شبه روحى

كان نفسى أقول للفجر

أهلاً وسهلاً

للمؤذن ماسك الميكروفون

والشمس ضاربه المسجد العرقان

كفى اللى عاشق

لسعة الجدران

والصهد طالع زى كف الهون

يا صابره وقت الحزن

يا مخدتى

يا ناعسه وقت الصبر والعوزه

ماتزينيش الليله فى الملايات

ماتزينيش النومه

فى المرايات

الليله مش هنبات

وهنماطل

يا دمعتى الخدلانه ع الناموسيه

هوا ليه قلبى بدأ يجتر

يوم ميلادى

ساعه وقت النهــار

والطفل مجبر والرحم مضطر

يا مولودين فى "الصوفى"

من سنى

إسمى أسامه

وإسم أبويا عصام

كائن طفيلى زى فطر العفن

كان نفسى أقول للفجر أهلاً وسهلاً

للغصون الميته

وللجريد

للشارع اللى محاوط الساحه

ياما التقينا هناك

أنا وهيا

المغربيه بنقطف اليوستفندى

والضفاير معقودين بالرياح

صوت الرياح

بيزينه النقشبندى

كان مغنى العشق والتراتيل

وكان زميل فى التوهه والأشجان

وهيا زى الطيف وزى النغم

زى الدعا والشعر والإدمان

كانت عروسة المولد القمره

ريحتها زى الأرض والعرقسوس

مكسوره

زى العدرا وقت المخاض

يا بنت يا مسافره ف ضميرى التعيس

إزاى تنامى وتقفلى المشربيه ؟

عن عيونى

عن عيون البشر

ودمى سارح فى الوريد

يبتسملك

هوا ليه قلب الربيع من حجر ؟

والبعد غصب

والقضا مش قدر

كل الأماكن تشبهك فى الموت

نفس الهلاوس وانعدام البصر

كان نفسى أصرخ زى كل البشر

كان نفسى أشوفك مره تانيه وأموت

كانن نفسى أقول للفجر

أهلاً وسهلاً

الله عليك ... تركيباتك فعلاً ملفتة ومقلقة ومدهشة ... احييك يا مبدع ... احييك من كل قلبى

أسامة سند الشاعر الشاعر

كل مرة تنسج لنا من خيوطك الرفيعة بين الفلسفة المبدعة

والابداع الفلسفي

شمسا خاصة تضيء المساافات بين الشعر والفكر والمتعة

أحييك هلي هذة القصيدة الماتعة كما عهدتك دائما

كن دائما بكل خير

تستحق التثبيت قطعا ولكن لك قصيدة مثبتة

hassan saber كتب:: الله عليك ... تركيباتك فعلاً ملفتة ومقلقة ومدهشة ... احييك يا مبدع ... احييك من كل قلبى

شكراً يا أ/حسن .. ده شئ يسعدنى إن القصيده تعجبك .. أتمنى أكون عند حسن ظنك طول الوقت .. تشرفت بمرورك على القصيده

محمود جمعة كتب:: أسامة سند الشاعر الشاعر

كل مرة تنسج لنا من خيوطك الرفيعة بين الفلسفة المبدعة

والابداع الفلسفي

شمسا خاصة تضيء المساافات بين الشعر والفكر والمتعة

أحييك هلي هذة القصيدة الماتعة كما عهدتك دائما

كن دائما بكل خير

تستحق التثبيت قطعا ولكن لك قصيدة مثبتة

يا أ/ محمود إنت كل مره تتحرجنى وتعطينى أكتر مما أستحق

الشعر بدون روح ما يبقاش شعر .. يبقى كلام وخلاص

ولو مكانش بيبعبر بصدق عن معاناة الإنسان يبقى مجرد كلام فارغ .. والواحد بيحاول يبقى جاد فى

طرحه لكن معرض للوقوع فى أخطاء طول الوقت .. المهم نفضل بس نحاول نقدم شئ للإنسانيه

ونساهم فى الميراث الإبداعى ولو بأقل مساهمه

رغم كثترة خلافنا إلا إنك وحشتني ودخلت اسلم عليك لعلك بخير يا شاعر وحمدا لله على سلامتك

استمتعت بين حروفك لك لونك الخاص ومذاقك الابداعي ومعجمك اللغوي الشعري الخاص
ومفرداتك الرومانسية وطابعة الاكثر من مميز تقبل مروري واعجابي

محمود بسيوني كتب:: رغم كثترة خلافنا إلا إنك وحشتني ودخلت اسلم عليك لعلك بخير يا شاعر وحمدا لله على سلامتك

هههههههههههههه .. وإنت واحشنى يا محمود بغض النظر عن الإختلافات
لسه ما وصلتش بينا المرحله اللى هنقاطع فيها بعض بسبب خلافات سياسيه .. أنا مصمم تماماً على الإحتفاظ بعلاقاتى بع الإخوه السلفيين .. والله العظيم أنا كان بيتعشى معايا فى البيت إمبارح صديق ليا من كوادر البناء والتنميه فى الفيوم .. وبعدين يا صديقى إحنا فى مجالنا ده من المفترض يبقى تفكيرنا سوى ونقدم نموذج للمصالحه بيننا وبين بعض .. لأن المجتمع بعد الثوره دخل مرحلة مراهقه صعبه جداً وبقى كل واحد عايز ينفصل ويعيش الحياه لوحده .. ما ينفعش نسمح للكلام ده إنه يحصل

أحمد رجب معيط كتب:: استمتعت بين حروفك لك لونك الخاص ومذاقك الابداعي ومعجمك اللغوي الشعري الخاص
ومفرداتك الرومانسية وطابعة الاكثر من مميز تقبل مروري واعجابي

أشكرك يا أ/ أحمد .. يسعدنى إن القصيده عجبتك
دايماً رقيق وعذب فى كلماتك

الشاعر الجميل
اسامه سند
حمدا لله على سلامتك .
والله وحشتنا ووحشتنا اعمالك الشعريه الرائعه .
احييك على نصك المفارق وجملك الشاعريه التى تسعد قارئها .
مودتى وتحيتى ..

عادل عوض سند كتب:: الشاعر الجميل
اسامه سند
حمدا لله على سلامتك .
والله وحشتنا ووحشتنا اعمالك الشعريه الرائعه .
احييك على نصك المفارق وجملك الشاعريه التى تسعد قارئها .
مودتى وتحيتى ..

أستاذ عادل .. الله يسلمك

إنت واحشنى أكتر وكل الناس اللى فى المنتدى .. دايماً تشرفنى لما تحطنى موضع لإهتمامك

» مش قد المقام
» أمان السيد .. شاعرية المقام
» المقام المحمدي : قبس من سيرته وشمائله : شعر : صبري الصبري