ورِجعت ريمَة....

ورِجعت ريمَة كالعَادَةْ

بتفرش.. دَمّي سجّادَةْ

وتشرب قهوتي السّادَةْ..

وتِحسدني...على المُوتَةْ !!

ورِجعت ريمَة بعبطهَا

غُنا الكروان بيحبِطهَا

وأكتر شيئ بيبسطهَا..

نَعيق البُوم.. على التُوتَةْ !!

ورِجعت ريمَة لطبَاعهَا

فلُول المَاضِي.. أتبَاعهَا

وشابكَة النَدل في دراعهَا..

وفايتَة عيَالهَا.. مكبُوتَةْ !!

ورِجعت ريمَة بالشنطَةْ

بترسم كُل يوم.. خِطّة

وإيد الجيش مَع الشُرطَةْ..

بتعزف لَحن عـ النوتَةْ !!

ورِجعت ريمَة للمَاضي

بتعمل دَوشَة عـ الفَاضي

وبرضُه الشّعب مش راضي..

يعيش حَدوتَة مَلتوتَةْ !!