بعد منتصف الليل

استيقظ احمد على رنين الهاتف فتح عينيه بصعوبة رفع سماعة الهاتف رد عليه صوت يعرفه جيدا : الحقني يا احمد فيه حد عندي جوه الشقة
انتبه احمد وقام من فراشه وجلس على حافة السرير نظر الى الساعة انها الواحدة بعد منتصف الليل : أنتي متأكدة يمكن بتهيألك مين اللي هيدخل عندك ودخل ازاي
بصوت هامس مرتعد : مش عارفة انا حاسة بيه جوه الشقة انا خايفة اوي أنا ..... ( صرخات متواصلة ) وانقطع الاتصال .
نزل احمد من منزله مسرعا ركب سيارته وانطلق بها كالمجنون لا يعلم كيف وصل ، رآه البواب اسرع اليه كعادته ساله احمد عن سماعه لصرخات او اى ضجة فى العمارة اجابه البواب بالنفي كان الشارع هادئ والعمارة ايضا هادئة جدا لا شئ غريب ارتبك احمد وطلب من البواب مرافقته وعندما وصل الى باب الشقة ووجده محطم مما يدل على دخول احدهم عنوة زاد قلقه دفع الباب برفق ونظر خلفه ثم دخل الشقة بحذر كل شئ فى مكانه اضاء المصابيح نادي على سهام بصوت مرتفع حينها سمع بكاءها وهى تخرج مسرعة من غرفتها ترتمي فى احضانه وهي تبكي بشدة (كان عايز يقتلني) ، ربت على كتفها احتواها ومسح دموعها وترجاها ان تهدأ وسالها هل رات وجهه فاجابت بالنفي وقبل ان يسالها عن اى شئ اخر احس بضربة على مؤخرة راسه وقبل ان يفقد وعيه تماما سمع صرخات سهام .
قام احمد من على فراشه وهو يحس بالم شديد فى راسه وبحركة تلقائية وضع يده على راسه تلفت حوله من جاء به الى غرفته ومن ضمد جرحه اتصل سريعا بسهام ولكنها لم تجيب اتصل بالشرطة وقبل ان ينزل نظر الى الساعة وكانت الواحدة بعد منتصف الليل .
نزل احمد من منزله مسرعا ركب سيارته وانطلق بها كالمجنون لا يعلم كيف وصل ، رآه البواب اسرع اليه كعادته ساله احمد عن سماعه لصرخات او اى ضجة فى العمارة لم يجيبه البواب ولكن تبعه بلا مبالاة وكأنها ليست المرة الأولي ، وصلا الاثنين الى باب الشقة دق احمد جرس الباب ولكن لم يجيبه أحد فسال نفسه اين هي ولماذا لا تجيب لابد وان حدث لها مكروه واجابه البواب : مفيش حد هيرد يا احمد بيه ، نظر اليه احمد مندهشا ولم ينتظر البواب حتي يساله فاجابه : سهام هانم سافرت مع جوزها مدحت بيه يجيلها ست شهور ، اتسعت عينا احمد دهشة : جوزها مين انا جوزها .
= لا يا احمد بيه انت طليقها .
= بس هنرجع لبعض
= باذن الله ، روح يا احمد بيه وانا ما سهام هانم تيجي هبلغك باذن الله
احمد بهستيرية : لا سهام جوه وفيه حد هياذيها ، هي اتصلت بيا
= يا احمد بيه الكلام ده ييجي من سنة بعد ما اطلقت منك بشهرين وجيت وقلتلي الكلام ده وصدقتك وطلعت معاك وفسخنا باب الشقة واتهجمت عليها قدام عيني وحصل اللي حصل وهي سامحتك ومن يوميها وانت كل يومين تلاتة تيجي تعمل الحكاية دي فى نص الليل ارجوك يا احمد بيه روح ما تضطرنيش امنعك بالعافية.
دفعه احمد بقوة ودفع الباب بكل قوته وقبل ان يكررها مرة اخري احس بضربة على مؤخرة راسه وقبل ان يفقد وعيه تماما سمع صرخات سهام.
فتح احمد عينيه ولم يقدر ان يتحرك ، التقط الهاتف وطلب الرقم الوحيد على هاتفه رقم سهام ولكنها لم تجيب لا يدري كيف وصل الى فراشه نظر الى الصورة الوحيدة فى الغرفة صورة سهام ونظر الي الساعة الوحيدة فى الغرفة وكانت الواحدة بعد منتصف الليل حاول ان يقوم ولكنه لم ينجح فصرخ باعلي صوته ينادي على حبيبته الوحيدة سهام ولكنها لم تجيبه ابدا ككل ليلة بعد منتصف الليل.