(الدم السايل)

(الدم السايل)


سالت الدم السايل

عن صاحبه

مين ساله

ومين أرداه

ومين ساح به

مين خانه ومين خاين

مين اللي قال ع الملا

الدم دا هاين

ياخلق فوقوا بقي

كتر البكا تباريح

بيطفي نور الفؤاد

وبيبطل التسبيح

ادعي وصلي الفروض

ف النافله ادعي

عالم سواد القلوب

عالم بانوارها

ولا كل داعي صَدق

ولا كل من نالها

سألت طير السما

لو ربما جاوب

هو الايمان بالوما

ولا كلام ف الريح

الحكمه في اللي اتقتل

ولا اللي قلبه جريح

العيب علي اللي بدا

قالي بلاش تلميح

الكل فيك ياوطن

وطني رفع رايه

شايل حياته كفن

وحبه ليك ايه

الدم سال للركب

بيه ناس بتتحنىَ

لو كنت حق افرزه

مين زيد ومين حنا

ومين يروح عالنار

ومين علي الجنه

القتل شَرعُه قابيل

وله نصيب منه

لو تدعي ليه ترتيل

قرأن او سنه

وحق جاه النبي

وحق من ولاه

القلب ليه حن بي

لما اهتدي بهداه

داعي الجهاد ياغبي

علي اخ ويا اخاه

كفنت ليه الصبي

لما الهه حياه

ربك ف ملكه حكم

ملهوش وكيل ع الارض

وانت بتدعي لصنم

وعملت حُكمه فرض

الدين براء ياغنم

منكم ليوم العرض

(طاهر الصوفاني)

اخى الشاعر الجميل
طاهر الصوفانى
اصبت والله اخى فى نصك الجميل .
وفعلا صدقت فى كل ما كتبته وليس تحيزاّ او شماته .
انما حق الله لابد ان يتبع .
تسلم ايدك ...