متغربين

متغربين
عشان نقدر نعيش فيكِ
متغربين
وقلوبنا شوق لمعاليكِ
متغربين وحلمنا
يوم رجوعنا نلاقيكِ
فرده جناحك لينا
بالخير اللي فيكِ
لكن يا ميت خُسارة
الحلم مكملشي
نرجع ثواني ليكِ
نقوم تاني نمشي
أحلمنا فوق حيطانك
نرسمها فتجهلينا
ونحلم بس بأمانك
تستخسريه فينا
رغم إن كنا
في الغربة نعطش تروينا
ولو يوم غلطنا
اسمك كان بسهوله يحمينا
اسمك كان رصيد وسلاح
طول عمره في ايدينا
نداوي بيه الجراح
نزخرف بتاريخه أسامينا
اسمك كان رداء أبيض
يطهر كل معاصينا
كان الستر في المحنة
وفي البرد كان يدفينا
وافقنا بالغربة عنك
وقولنا دين علينا
وقولنا إحنا منك
ومسيرك تعوضينا
والعمر كله عدا
وماتت أمانينا
والعالم كله عدا
وإنتِ بتخزلينا
القلب فيكِ مات
وبأتي تيجي علينا
وعشانك الورد مات
ولساكي عايشه فينا
الحب جوانا ليكِ
قدر مِتحكم فينا
وقدرنا نهون عليكِ
وعنك تغربينا
أبوس كل حاجة فيكِ
حني يا قسيه علينا
أصل اللسان الغريب
بقول ضحكتي علينا
لو صح .. مياه النيل
ها تكون دموع عنينا
وها يفضل المستحيل
إنك تهوني علينا
وها نكمل بقيت العمر
زي ما إحنا متغربين
وندعي العمر يمر
وإحنا جوانا الحنين
ويوم خروج السر
ها نوقع بالجاثمين
ع القبر بكلمة سر
اسمها مُشتاقين
يمكن تُشطبي في أرضك
الغربة م القوانين
وما تقولش تاني الأم
ولادي متغربين

وليد الوصيف

أشكرك أستاذ / عاطف 

على مرورك الراقي 

وأتمنى أن أكون عند حسن ظنك