سيبينى أجدد التوبة

سيبينى أجدد التوبة
ـــــــــــــــــــــــــــــــــــــــأحمد عبدالفتاح العوامرى

مانيش "ناصر "
ولا "السادات "
ولا "حسنى "
ولا "مرسى "
أنا نفسى
مليش منصب ولا كرسى
ولا غير..
حبة شعر بكتبهم
وأنا خجلان
وفضلة خير..
أبويا اللى علّمنى :
ماكونش جبان
أنا الوحدانى فى بلادكم
مليش سكة
مليش شركة ولا مشروع
ولا مرة شكيت من جوع
سبت سنينى وسابتنى
نزلت انادى على كفنى
صرخت :
حـــــــــــــــــــــــرّيـــــــــــــــــة
شرخت قليبى باديا :
عـــــــــدالـة اجتــــــــــمـاعيــة
ومفيش فايدة
مليش دية
ولا منصب ولا كرسى
مانيش "مرسى "
ولا "حسنى "
ولا "السادات "
ولا "ناصر "
أنا يدوبك مجرد قطر بيسافر
وليل فى الضلمة متورط
بيستعبط على بكرة
اللى "ف" نفسه بيخّبط
مطولتش حتة فى الطورطة
مشلتش غير وجع
فى حياتى لازمنى
وحبة صبر هازمنى
مندمنى /على أنى / قبلت اكبر
رسمت طريقى فى الدفتر
بلملمنى من الشارع
ومن أوراقك الناشفة
ومن أحلامك الهايفة
وكل وعودك الزايفة
وكل ماعلم رجلى تنساكى
بكون عاجز
100 حاجز تحطيهم بتشترطى
وانا بطيبتى
مانيش قادر
مانيش "ناصر "
ولا "السادات "
ولا "مرسى"
ولا "حسنى "
أنا بحزنى
مبستكفاش
مبستغناش عن الدمعة اللى بتخونى
عن الخيبة اللى بتكونى
مانيش غير توهتك الكبرى
وكل ملامحك الغبره
بتوصفنى
بتعزفنى نشيد مالهوش أهمية
بطل ورقى / يدوب صورة
فى أسطورة وهمية
بترمينى وأنا الممنوع من الضحكة
أنا الدبلان ..
خيوط دَبلان بتتقّطع
فكيف انتوا تعِزّونى ؟!
بكون راسكم لشيلة الهم
ولا مٌهتم لشئونى
مابشوفكمش غير فى الفرح
ولمّا الجرح يغوينى
ينزّ الدم
ولا بتيجوا تعَزّونى
مانيش اكتر من المشنوق فى بوابتك
لا "م " السادة ولا البهوات
مانيش "مرسى " ولا "حسنى "
ولا "ناصر " ولا " السادات "
انا حكاية ... بتحكيها فى آخر الليل
لأطفالك
ولا مرة بتصفيلى وبصفالك
تصّفيلى مشاعرى اللى واهبهالك
وانا هالك
اغنيلك واقولهالك
بحبك حب "م " الاصلى
ومانسيتش فى يوم أصلى ولا فصلى
ولا مٌرك ولا عسلى
ولا أنى إذا سبتك
يدوب خطوة وبتجاهل
واذا صبتك بخرطوشة
بدالك أموت واستاهل
لانا "ناصر" ولا "مرسى"
ولا "حسنى" ولا "السادات"
فى تليفونك يدوب رنات
ماتمسحنيش
ماتسحلينيش
سيبينى ف دفترك عايش
وبتعايش مع خوفى
مع ظروفى اللى غيرها مليش
سيبينى أجدد التوبة
وانسى انى قبلت أعيش .
ـــــــــــــــــــــــــــــــــــــــــــــــــــــــــــــــــــ
أحمد عبدالفتاح العوامرى

الشاعر الراق أحمد عبد الفتاح

يسعدني أن أمر على هذا الإبداع والعمل الرائع لك فما أجمل نظمه وحسن السبك فيه وجمال الكلمات
والتي تشي بشاعر كبير يمتلك أدواته
فشكرا لك

الشاعر الجميل

احمد عبد الفتاح

انت شاعر جيد وهذا وضح من نصك الذى راقنا

وكيفية طرحك لقضية تؤرقنا جميعا بطريقة واعيه .

احييك على حرفك واتمنى قراءة المزيد من ابداعاتك .

مودتى وتحيتى ...

الشاعر الجميل ضياء الدين البرى أشكرك على مرورك والروعة تكمن فى قرأتك الغالية ، تقبل مودتى واحترامى .

الاستاذ الشاعر محمود بسيونى أشكرك على مرورك الكريم ، واتمنى مزيد من التواصل

الشاعر واستاذنا القدير عادل سند
التحية والتقدير لقرأتك
والجودة تكمن فى رعايتكم لهذا المنتدى الواسع الانتشار
تقبل اعتزازى بشخصكم .

أخى أحمد
نحن أمام شاعر رائع
له صوره المدهشة و تبقى الوزن هو مشكلة النص
فى بعض المناطق
تقبل ودى و أهلا بك شاعرنا المجيد
ننتظرك على قارعة الجمال

قصيدة رائعة
واحلى مافيها انها جاءت صادقة المعنى
ومن قلب يعشق الكلمة التى ينطق بها

تحياتى وتقديرى