انا اسف

انا اسف

لما كل حاجة فيكي
تتقسم نصين
نص اللي رايح مع
والتاني بيخالف
ويضيع الفرق فيكي
ما بين صالح وبين تالف
وبتساليني الصح فين
يا حبيبتي مش عارف
انا الطرف اللي ساكت
ع الحياد واقف
اروح مع دول اموت كافر
اساند دول اكون خاين
احط الايد على عنيا
وازق لساني في حلقي
اتوصم بالجبن
اعيش خايف
انا خايف
دليني اعمل ايه
يا حبيبتي انا محتار
الفين تلاف حنجرة
بتبخ في وداني
م الناحية دي بالجاز
والناحية دي بالنار
وعنيا متفنجلة
لكني مش شايف
زعلان عليكي
ولا باديا انا حيله
ترتايه بيشقها
جبهة وجماعة
لتنين بلا نيله
نزفت مكان العسل
حسرة والم على هم
طعم الفروله اتقلب
لازع بطعم الدم
مش لاقي حاجة اقولها ليكي
يا حبيبتي
غير انا
اسف
انا اسف
شعر حاتم كامل 27/2/2013