إرتجالة : أحمد الشرقاوى l أية حافظ

إرتجالة مع الشاعرة المبدعة جداً ,, أية حافظ , البداية عندى
:
:
:

دم النهار ,,
بيجرى فـ عروق ضحكِتك ،
ويبل ريق الشمس من نور لمسِتك
لملامح الحلم اللى راسمك دندنات
بريشة من ضىّ البنات ،
لحظة شروقك ع اللى باقى م الأمل ،
يلمس فـ روحك مكتمل
مشوار مشاعرى بفجر صوتك ع الأذان ،
بددوق وشك على القهوة
كـ طعم كمان
بيعزف روحى على سهوة
بلحن حليب ,, وهمسة بُن ,, ،
وأدوّب حلمى فـ الفنجان
فـ بسمع قلبه فـ موسيقتك
نغم بيرِن ,, ،
فـ بلمح قهوتى فـ صورتك
حلاوة روح ,,
تزود سُكر الأحلام فـ أيامى
عن المسموح .

دم النهار
سايل على خدود القمر
و نهارى لسه عمره جاىّ
فى المقتبل
ضىّ النهار مرسوم بلون ضيّك
ياللّى ما بين كل النجوم
ما لقيت جمال زيّك
لمّا الجمال قرر يكون انسان
نحت الجمال لوحة ولا الفنان
و اللوحة مرسومة بضىّ و لون
من حسنها يسجد جمال الكون
شمسك بتطلع ع الوجود تحييّه
من بعد موته ف زحمة الحرمان
و النور ف عينك ضىّ عايش بيه
حالف لـ يثبت ان انا انسان
برمى الورود تحت القدم خطى
دمى قصيدة كتبتها بخطى
رافض فى حبك انى أبات مغلوب
سارح فى ملكوتك كما المجذوب
كافر بشرعك لوّ يقولى توب .