مَـسـرَحِـيَّـة .. فـَصـل واحِـد. للطبيب الشاعر/ د.محمد رزق

مَـســـرَحِـيَّـة .. فـَصـــل واحِـد ...
***
من كلمات
**
الطبيب الشاعر/ د.محمد رزق
*

قـُلنا ثورة ..؛ قـُمنا ثورة
والقلوب كانت بـِتـِرجـِف مِ المِـحاورَة
والدموع كانت بـِتِـنزف مِ القـنابـِل
دَمِّنا بـِالحُب سايـِل ،
حُـبـِّنا عامِل عَـمايـِل ..!
يـِغلِـب الخوف اللى كان جوَّانا حايـِل ،
بين إرادِتنا وشموخنا ؛
بين شَـبابـنا وبين شيوخنا ؛
ضارب الحق ف نافوخنا ..،
قـُمنا قـُمنا ..؛!
سِـبنا نومنا ..؛!
والكِـتاف زَقـِّت همومنا ،
والشموس بانِـت ف يومنا ،
تِكتِب الطـبشـورة بُكرة ،
تِمسَـح الماضى البشاورة ..
مسرحية .. فصل واحد ،
والسِّـبَـق كان بس دورة ..

قلنا ثورة ..؛ يعنى وحدة ،
يعنى كلمة صدق واحدة ،
يعنى نِـبعِـد كل فاسد ،
يعنى نِـقـدَر ع المناورة ..؛
واللى يتعب يوم نشيلـُه ،
واللى يـِقـدَر نشتكيلـُه ،
واللى يبعد عن طريقنا
من قلوبنا حَ نـَّاديلـُه ،
يعنى كل الدنيا تعرف ،
إننا أد المغامرة ..؛
مش بنلعب فى التحدى ،
أو بـِنـِخسَـر ، مِـش مُقامرة ،
والدوافع ألف دافع ،
مش حـتِـغـلِـبها المدافع ،
والمكايـِد والمؤامرة ،
مسرحية .. فصل واحد ،
والسَّـبَـق كان بس دورة

دُرنا دَورَة ، بَـرَّا دَورَة ،
فِ السَّـبَـق وطلِعنا بَـرَّة ،
زَى ماتكون النفوس كانت ف جَرَّة ...
واللا تاهـِت فى المَفارِق ،
واللى نافِـق ؛ واللى فارِق ،
وامَّا نِـسأل : ليه بـِتـِبعِـد ؟!
الإجابة : أصـلِى حُـرَّة ..!
هِـىَّ حُـرَّة ؛ أيوَه حُـرَّة ،
بس إيه المَعـنـَى : حُـرَّة ؟!
يَعنِـى باعـرَف إيه حـقوقى ،
يَعنِى باعـمِل كُل واجـِب ،
واللى بـِيكـَحَّـل شروقى
لـَمِّـتى وَيَّـا الحـبايـِب ،
يَعنِى مُـسلِـم أو مَسيحى ،
يَعنِى مَـصرى مِن نـُخاعى ،
يَعنِى وَقـت الشـِّدَة راجـِل ،
يَعنِى مُـخلِـص بَسِّ واعِـى ..!،
يَعنِى عارِف مَصر أمـِّى ،
والتـُّراب يحميه دِراعى ،
مِـش إيدين سابـِت إيديها
أو عيون نامِت عينيها ،
واللى ناهـِب مِ البَـلـَدِّى* ( *البلد دى )
بـِيعانِدها وبـِيعاديها
واللى صابـِر عَ التـَّحَـدِّى
بـِيهاوِدها وبـِيداديها ؛
لِسَّــه إيد الشر طايلـَة
تِـنهـَب الخير اللى فيها ...!
واللى باقى مش مِكـَفـِّى
واللى والـِع مِش مِطـَفـِّى
والحياة فى الغـُلب مُـرَّة
والـدَّوا بـِالحُـب يـِشـفِى
والفساد فارض غرورُه
فِ البـِلاد مادِد جدورُه
عَ العِـباد قايـِم بـِدورُه
والضـَّلام بـِيطـَفـِّى نورُه
واللى عايـِش بـِالمَـبادئ
لِـسـَّه ماسِـك ألف جَـمرة
مَسرَحِـيـَّة .. فـَصل واحِـد ،
والسَّـبَـق كان بَـسِّ دَورَة ...

تـِيجو نـِنسَـى ..!؛ تـِيجو نـِرجَـع ..!؛
تيجو نِـسمَح لِـ اللى خانوا ،
يـِضربوا ، والضرب يـِوجَـع ..!؛
تـِيجو نـِتأسَّـف لِـغادِر ،
نِـعـتِـرِف ، والغـَدر يـِنفـَع ..!؛
تـِيجو نِـقـتِـل حِـلم بـُكرَة ؛
والأمـَل ، ونـسيـبها تِـولـَع ..!؛
واللا نِـرجَـع للبـِداية ،
والتـَرابـُط والتـَّحَـدِّى ،
قـَبل ماتكون النهاية ،
بـِالفـَشـَل أو بالتـَّرَدِّى ؛
يـِنـتِـصِـر فيها اللى خايـِن ،
واللى بايـِع ، والتـَّعَـدِّى ،
والسـِّتارَة السودا تِـنزِل
عَ الكرامَة ، وعَ المُـظاهرَة ...!
لـَو حَ يـِكمَـل فـَصل واحِـد ،
تـِبـقـَى عاشِـت مَـصر حـُرَّة ؛
بَـس يـِبقـَى الكل واحِـد ،
زى أوِّل يوم فِ ثورة .

القاهرة فى يوم
الأربعاء 11 مايو 2011

مع تحيات
الطبيب الشاعر/ د.محمد رزق
http://elshaereltabib.blogspot.com/

طبيبنا الشاعر المبدع

والله يادكتور أشعربمرارة حرفك يداعبه أمل يعتصر بحرقة في قلبك وغصة في حلقك كتلك التي أعيشها وأتجرعها ولا نملك الا أن نقول ياألله ليس لها من دونك كاشفة
ربنا يكرمك يادكتور
أبوعبدالرحمن

السلام عليكم ورحمة الله وبركاته
أخي العزيز وأستاذي الشاعر / الطبيب الشاعر
أنتظر حرفك دائما
قرأتها من قبل واستمتعت

لـَو حَ يـِكمَـل فـَصل واحِـد ،
تـِبـقـَى عاشِـت مَـصر حـُرَّة ؛
بَـس يـِبقـَى الكل واحِـد ،
زى أوِّل يوم فِ ثورة .

وقرأتها اليوم فاستمتعت أكثر
حفظ الله مصر
وفي انتظار جديدك

نص ولا اروع فيه شعر ووطنية
فيه وجع وحسرة ومكاشفة
كلمات موجعة بس للاسف حقيقية
واقع مرير ندعو الله
ان نصل جميعا الى بر الامان
دام الابداع شاعرنا القدير تحياتي

اخى وشاعرى المفضل

دكتور / محمد رزق

تلك ثورة قلم وفكر من شاعرنا الرائع دكتور / محمد .

طرحت الثوره فى سطورك بما لها وماعليها .

وبما تراه من مزايا وعيوب . ثم تضع الامل فى الغد

وهنا لابد ان نفتح طاقة للنور ربما يتسرب لنا شعاع من نور .

وهذا ما تفعله دائماّ اخى الشاعر فى معظم نصوصك .

احييك واشد على يدك لهذا النبض الوطنى الرائع .

مودتى وتقديرى ...

زائر

الله الله الله يادكتور

الله على روعة شاعريتك وجمال الفكرة والنص

بجد بجد أمتعتنى

إحساس عالى وحضور متألق بين السطور

أسعدك الله على قدر ماأسعدتنى بكلماتك أيها المبدع

نقبل تحياتى ولك خالص الحب والتقدير