صمتِك لأ !؟

صمتك لأ
,,,,,,,,,,,,,,,
كل ما أقول قربت لسورك
ألقي غرورك
يبعدني ويعلي السور
ألقاني راجع مكسور
أرمي ملامح حزني ف صبري
يمكن تِدري
يمكن يرضي يفتح حُضنِك
يفتح حِصنِك لجل أمُر
وفُراقِك يسقيني المُر
وأنتي ف أول عِشقِك
قاتله بأيدك قلبك
عايشه بعقلِك
وبرغم انك شايفه بعينك
رايتي البيضا هناك بِترفرف
دمي عليها تمللي بينزف
راسم قلب بيعشق صورتِك
دهشه ف ردك .. ردك صمت
وأنتي ف صمتك
عكس جميع النسوه الصامته
صمتِك لأ
عكس جميع الناس
صمتِك لأ
رافضه تمللي حروف العِشق
وأنا معركتي مش وياكي
مع قلبي الدايب ف هواكي
اللي مسلِم ليكي زمامه
واما يقول قربت انساكي
وهزايم لينا بيتعادوا
ترجع تاني عنيكي ينادوا
ينسي القلب هزيمته ويرجع
يرميني قُدام السور
يحلم .. واحلم نعبر حاجز
نصبر جايز
تِرضي ف يوم بالعشق الهادِر
ينبُض قلبك مره بأسمي
يرجع تاني .. يرجع قادر
يفتح حُضنه نشوف النور
يمكِن نور !!
وانا وخداني الحيره وصابر
القي غرورِك يوم مانزورِك
يطردنا ويعلي السور
من تاني ارجع مكسور
وتغطيني ملامِح يأسي
من قلبي المهزوم ع السور
وهعيش من غيره ويدور
حواليكي وحوالين السور
وأشُك إنك يوم تناديه
أو حتي ممكن ترضيه
أو يقدر ويعدي السور
لكن أنا قررت أنساكي
والقلب المذلول هارميه !!

اخى وحبيبى الشاعر الجميل

فارس القرشى

اولاّ اعتذر عن تأخيرى فى المرور على رائعتك .

ثانياّ . بعد كل ماقيل .. لا اجد ما يفيك حقك كشاعر اسعدنا

بنص به كل المقومات للنص الكامل المتكامل وزن ومعنى .

انت شاعر يُرفع له القبعه واشد على يدك لروعتك وجمال حرفك .

مودتى ياغالى ...