طوق النجاة
شعر/سعدالشرقاوى
يا حضرين حرب أكتوبر
وعايشين من سنة خمسين
صنعتوا النصر على إيدكم
وعارفين طوق نجاتها فين
قولولى ياخلق فين داركم
عشان محتاج لأفكاركم
نلم الشمل ونسلم
حبال الطوق لمصريين
,,,,
ماهش عيبة أمّا جرّبنا
دا يامه يامصر ضحّينا
وصدّقنا اللى ضللنا
وعبىّ البحر بطحينة
ودهست خيله أرواحنا
تدرّج نبْت أفراحنا
وبعد المِلك أصبحْنا
عبيد القصر مكريين
,,,,
بإيدنا بنحفروا قبورنا
ندارى الدمع ونجرّب
حنينا الضهر وصبرنا
وخولي الارض بيخرّب
لقينا صُبحها امبارح
وحالف نيلها مش طارح
وسوسها فى العصب سارح
وخللا عيونها مش شايفين
,,,,
تعالوا الأرض مشتاقة
توفيّ معانا بوعودها
يبان النور من الطاقة
يخضـّر بالهنا عودها
وترجع مصرنا لينا
وتاني نشيلها فى عنينا
ساعتها المولى يحمينا
ويحفظها ليوم الدين
الأحد نوفمبر 17, 2024 9:53 pm من طرف 
موضوع: طوق النجاة 
