هلفطه سياسيه

موضوع: هلفطه سياسيه السبت مارس 09, 2013 2:32 pm

(هلفطه سياسيه)

دا واحد صاحبي بيهلفط
وصورة مرسي قدامه
وأنا سايبه بيستعبط
مصدق كل أوهامه
وفي الاحلام بيشعبط
وبيطالب بـــ إعدامه

******
وقال دا شعب يستاهله
ولاكان يوم وحبيته
وبالاستبن ها ندهله
وبتمنى خراب بيته
بقى فاكر هيشفعله
جماعته وسكره وزيته
******
ماقولنالكم من الأول
ياعالم دا احنا فاهمينه
هييجي اليوم وهنولول
ونشتم فيه وفي سنينه
وخوفنا وليلنا هيطول
وهنشوف البلا بعينه
*******

وصاحبي كان واخد راحته
ودي عاده مايعدمهاش
وسيبته يقول وريحته
ما أنا عارفه ياناس بكاش
وانا لو زيه... شرشحته
لكن لغته.... مابعرفهاش
*****

فياصاحبي يامتعلم
تعالى معايا نتفاهم
بدون ماتسب نتكلم
طالما انك راجل فاهم
و لو موجوع بتتألم
تكون واعي و مش واهم
*******

تعالى نجيبها م الأول
عشان بالراحه تفهمني
رئيس دا ولابتسول؟؟
ياعم قول وكلمني !!
وهل شايفه بيتغول ؟؟
وانا بس اللي يحكمني؟؟
******

دا لو واحد معاه مدفع
مفيش في مسدسه طلقه
بقى بالله كده ينفع
دا يستاهل كذا علقه
وكل الخلق فيه ترقع
وع الزيرو ياخد حالقه
*****

فقام حصن قراراته
وشال فجأه نائبنا العام
وغار طنطاوي واخواته
وجا السيسي بفكر تمام
و دم كتير وناس ماتوا
فجاب نائب يجيب إعدام
*******
**********

ظهور الحق مش ساهل
ومن غيرنا هيحمي الحق
فداه روحنا و يستاهل
ولو كله بيصرخ لأ
ولو فينا واحد جاهل
فيتناقش ياإما يطق

******

بقى دي الوقتي عاجبينك
جماعة العادلي ومبارك
بقى مش كانوا زالينك
وحاسبين لك هوا دارك
خساره !! كنا فاكرينك
بتمشي في ظلل أفكارك
*******

ماتفرض سعادتك بقيت الرئيس
وفزت بجداره معاك أغلبيه
عشان بس واحد بهبل في فيس
نشقلب حياتنا وتصبح وسيه
ونسمع نصايح عمرو ولميس
وكل الاعادي بتوع الرزيه
*******

إذا الثورة يعني معتش قيود
ولاحد يقدر يخاطب شباب
بلاها المباديء بتاع الجدود
ونفضل نشرشح وننزل سباب
فلو حتى دولة ساكنها أسود!!
هيحكم قانون القطط والكلاب
********

تهبهب هتنهب وتبقى بطل
وتبقى الدراع اليمين للحكومه
وتبقى مناضل وراجل عسل
سايسي محنك معاك ابن دومه
مؤدب هتسكت قفاك يشتغل
وتيجي تنونو هتسكت بشومه

أبو عبدالرحمن الصديق العرمان

السعودية.الخبر ..مارس2013م

زائر

الله الله عليك يا ابا عبد الرحمن ... والله اخيرا حسيت انى بشوف شعر مش هلفطة تافهة ولا برطمة شيطانية...ربنا يحفظك لمصر وشعبها ويريحنا بقى من الفلول وازنابها ... دمت يا شيخ موفق

موضوع: رد: هلفطه سياسيه الأحد مارس 10, 2013 8:18 am

أخي الحبيب وشاعرنا الجميل أبو عبدالرحمن..رائع أنت ياشاعر في كل ألوان العاميّة وقد أبحرت هنا في بحر فن الزّجل بإقتدار وتمكّن تُحسد عليه..وهذا ليس بالغريب على شاعر في قامة أبو عبدالرحمن..لولا وجود بعض الهنّات العَروضيّة في القليل من المواضع مثل (طالما انك راجل فاهم / وكل الخلق فيه ترقع ) ثم الإنتقال بالوزن من بداية (ماتفرض سعادتك بقيت الرئيس ) رغم أن قيامك بفصل المقاطع بعلامات الترقيم يشفع لك الإنتقال بين بحور الشعر غير أنه غير مُستحب في فن الزّجل على وجه الخصوص.

أخيراً..أحييك على روعة إبداعك وجمال صياغتك وإمتلاكك لقاموس لغوّي زاخر بالكثير من مفردات العاميّة....

موضوع: رد: هلفطه سياسيه الأحد مارس 10, 2013 9:07 am

اخي / اخواني ويشرفني ذلك طبعا( مع اني لااخواني لاانا ولااخويا لكنها جات كده هههههههههه )

مرورك يسعدني ويشرفني تعقيبك ويارب يكرمك مانستاهلش دا كله الله يسترك ويحفظ مصر بمن فيها من الناس الطيبين
شكرا لك
أبو عبدالرحمن

موضوع: رد: هلفطه سياسيه الأحد مارس 10, 2013 9:14 am

أستاذ رضا
الظاهر الواحد خاد على الدلع ومعتش بيدقق بقى لكن طالما موجود امثال حضرتك وهذا النقد الرائع الذي افتقدته منذ فترة أعدك بالحرص في المرات القادمة انشاء الله ولاأخفيك سرا أنني كنت أعرف مسبقا سقوط الايقاع والتغير مني في فقرة (ماتفرض سعادتك بقيت الرئيس ) ويمكن ده بسبب تغييير مكان الكتابة ووقتها للانشغال وقطع حبل الافكار لفترة ثم بدأت في الكتابة معتمدا على حاسة الظن في البحر الذي معي وبعدما جمعت الابيات بيني وبينك لم يكن لدي وقت يسعفني ولا جهد وحافظة تعيد الصياغة فعديها لي المره دي أما ماتفضلت به سابقا غير ذلك فربما تتفاوت من حيث اياعات النطق عندي هكذا أظن
عموما شكرا لك وأتمنى الاستمرار في النقد وهذا يسعدني كثيرا
أبو عبدالرحمن

موضوع: رد: هلفطه سياسيه الأحد مارس 10, 2013 12:27 pm

أبو عبدالرحمن
قدر إعجابى بإسلوبك الراقى فى تناول الأفكار و القضايا الشائكة بعمق و بتفهم كامل و بصوت هادئ , أعظم منه إعجابى بسعة صدرك و إستيعابك للمختلفين معك الذى يتجلى فى كل تعليقاتك التى إستمتعت بمتابعتها , و تمنيت أن يتبع هذا النهج و أن يتعلم منك و من أدبك و عذوبتك كل ناقد لفكر مختلف لتتألف القلوب بلا إنكار أو إستنكار .
لك و لقلمك كل مودة و إحترام

موضوع: رد: هلفطه سياسيه الأحد مارس 10, 2013 1:16 pm

شاعرنا المحترم / الاستاذ حسن
أسعدك الله ورفع شانك أخي الكريم ....ممنون جدا لمرورك العطر وتسطيرك كلمات( كتيره علي ) لاتخرج الا من شخص محترم متفهم معنى اختلاف الرأي بمنتهى الود والحب وفعلا مصر لن تعود الا بعودة الحب والود لأولادها مهما اختلفت الرؤى وتباينت الأراء بأسلوب يجمع ولايفرق .
شكرا لك
أبو عبدالرحمن

السلام عليكم ورحمة الله وبركاته
أخي العزيز الشاعر / أبو عبد الرحمن
نص ممتع
عرضت افكارك كما تريد
في انتظار جديدك أخي

اخى الشاعر الجميل

ابو عبد الرحمن

والله نصك جميل بمحتواه وفكره ورؤيته .

وانت شاعر جيد جدا وتعرف كيف تُكتب القصيده .

لكل منا وجهة نظر لابد ان تُحترم . ولكن ما لاحظته رغم اجادتك .

انك بدأت النص بتفعيلة الهزج وهى { مفاعيلن } الى :

{ ماتفرض سعادتك بقيت الرئيس } وهنا غيرت البحر الى المتقارب

فظهر الفرق الواضح فى التغيير .

احييك على نصك الجميل وفكرك الرائع .

مودتى وتحيتى ...

» مخدرات سياسيه (صنف الميري)
» لست الأول ولست الأخير ( سياسيه )