من وحي الأمثال الشعبيّة / المجموعة الأولى

إمشي طريقَك عِدِلْ.. يحتار عـدُوّك فيكْ

ياللّي غويت الجَدَلْ..ذِكـر الإلـه يكـفيكْ

إسمع كلام النَبي في حالتنا دي بالذّاتْ

بُعدَك عن الشُبهَاتْ..من كُل سُوء يعفيكْ

************

لو سَقف بيتك قِزازْ..ما ترمنيش بالطُوبْ

إجعل سكُـوتَك مَلاذْ..تداري فيـه العيُـوبْ

كُل ابن آدَم ضعيفْ..ومفيش بَشَر معصُومْ

لو الضَمير مَعدَومْ.. يبقى الأسَاس معـيُوبْ!!

*********

لو الكلام من فَضَةْ..يبقى السكُوت من دَهَبْ

الصَـبر وقت الشِـدّةْ..يطفي لهيب الغَضَـبْ

أصل الرجال أفعَالْ..والوَزن بالأحمَالْ

والضَهر لو حَمّالْ..بيهون عليه التَعَـبْ

**************

جيبتك أكيد العوازِلْ...كِدت بيـك رُوحي

عرفت مَعنى التنازُلْ..حَتّى عن رُوحي

عَصرت عُمري.. سقيتك شَهد باستمرَارْ

شِربت فيك المَرارْ..ورجعت بجرُوحي

************

عتاب النَدل إجتنابُه..وحضُورُه زي الغيَابْ

يضحك في وشّك بنَابُهْ..والقَلب لون الغُرابْ

لا بيعرف المَعـرُوفْ..ولا ينجد الملهُـوفْ

واللّي يعيش بيشُوفْ..ولكُـل شيئ أسبَـابْ

*************

الواطي مهمَا عِلِي..أصلُه يـرُدّ عليهْ

والعَقل لو مُبتَلِي..الجَهل يسكُـن فيـهْ

الرك عـ الأخلاقْ..والقلب بيت الدّاءْ

واللّي اتعَجَن بغبَاءْ..مفيش دوا يشفيهْ

**************

لكُل جَـرح دواهْ..ولكُل بَاب (مُـفتَاحْ)

سيب الأمور للهْ..قلبَك يعيش مِرتَاحْ

إجعل كفاحَك سبَبْ..دا الرزق مش بالتَعَبْ

من إمتى جِدر العِنَبْ..يطرَح شَجَر تفّاحْ؟!!

**************

الصَبر طيّب يا قلبي..والنَصيب غَـلاّبْ

والحِكمَة من فَضل ربّي..والزَمَن قَـلاّبْ

مهما يطُول الليلْ..الفَجر لُه مَواعِيدْ

وبُكرة صُبح جديدْ..يفتح علينا البَـابْ

***********

إن مال عليك الزمَنْ..ميّـل على دراعَكْ

مفيش غَريب مُؤتمَنْ..لو القريب بَاعَـكْ

الدنيا عايزة القوي..زي الجَبل في الرّيحْ

كُتر العتَاب تبَاريحْ..بيزيد في أوجَاعَكْ

**********

جبال الكُحل تفنيها المراوِدْ

وكِنزالمال بتفنيـه السنينْ

فرُوع الأصل من نبع الأجَاودْ

تفيض بالخير لكُل العطشَانينْ

إخواني الشعراء الأفاضل..أرجو المعذرة عن تأخرّي في التفاعل مع ردودكم العاطرة ...أشكركم جميعاً وبأمر الله سأقوم بالتعقيب على كُل ردّ على حدى..
تحيااااتي وتقديري للجميع