طالعه المراكب يوم 25

طالعه المراكب يوم 25

طالعه المراكب يامشاله عليها
صوت العيال الحلو جه يصحيها
دم الشهيد زعق وحنا ايديها
واخد كفوفها بشده تحت بطاطها
..........
طالعه المراكب بالفرح والزفه
جايبه العيال الزاعقه جوه اللفه
تدفنها في قبور الشرف والعفه
والزرع لاخضر والفراش حوطها
..........
طالعه المراكب سلمولي وبوسو
رافعه العلم ع الصاري مش بتدوسو
رايحه علي بيت الامير حتعوصو
والدم لاحمر مش بعيد سلطها
..........
طالعه المراكب ماشيه تاتا وتاتا
شايله الملبس محشي بالشيكولاته
جايبه الحرير بتكلف الخياطه
تنقش قلوب الخلق وتخيطها
..........
طالعه المراكب موجه تدي لموجه
مزقوقه من ظلم الغفر والحوجه
من ليله طلعت بس طلعت عوجه
ونفوس مريضه ذودت احباطها
..........
طالعه المراكب ف الشوارع زحمه
مش عايزه منك كيلو زيت ولا لحمه
طالعه تنادي العدل فين والرحمه
وانت اللي جهلك بالإصول ورطها
..........
طالعه المراكب ( للسيده ) تبخرها
سمت عليها وإيدها طفت نارها
طالع عليها ( مسيلمه) يعورها
دايس علي كل الجروح غوطها
..........
طالعه المراكب شايله رغبة مينا
مين اللي عايز يدي مصر لسينا ؟
يبعت رسايل لليهود تحمينا
وتجيب اميركا علينا وتوسطها
..........
طالعه المراكب شده حيلها ووزنه
مصر الجديده ياوليد مش خزنه
ولا هيه بقره ترضعك ف بزازنا
ولا هيه هبله وجي تستعبطها
..........
طالعه المراكب واحنا فيها ضيوف
مكتوب عليها مصر احلا حروف
مش بالزعيق ولا بالنهيق ياخروف
عارفه طريقها الجي رابطه رباطها
..........
طالعه المراكب شايله فيها كفنها
عارفه معاويه ومين ابو سفيانها
عارفه اللي باع كل الهدوم علشانها
عارفه اللي نايم علي كوم الفلوس بططها
..........
طالعه المراكب كل لحظه وساعه
لقيت اصول كل البلد متباعه
حطوا الشريعه ميداليه ع الشماعه
طلع العيال مش خايفه من ظباطها
..........
طالعه المراكب م الميدان والجامع
تنده عليه بس ( عليه ) مش سامع
قالوا الامير نايم ولسه مجامع
ايده الشريفه وصابعه حيظبطها
..........
طالعه المراكب عامله سد وحيطه
جابولها مرشد يابنات مش ( تيتا )
قال يعني هو الكتف ناقصه شريطه
الفرن والع يالا شموا شياطها
..........
طالعه المراكب خيمه زحمت خيمه
عدت عليها ملايكه ضل وغيمه
لما السماسره اتفرجت ع السيما
بعتت جيوش النمل ياكل باطها
..........
طالعه المراكب مش راجعه غير بحقوق
جايه ( المحله ) تهني باب اللوق
قصر الخليفه حيبقا ( قصر الشوق )
واللي حيحكم مصر مش وطواطها

لي الشرف بان اكون صاحب اول مرور
علي القصيدة الرائعة
ذات الكلمات المعبرة
دام ابداعك استاذ عطية

شاعرنا المبدع واستاذنا الفاضل عطيه شواش
تحيه طيبه لحضرتك
كلمات رائعه الجمال صادقه الاحساس
حقيقه على الارض نعيشها
استاذى الكريم نعم صدقت ولكننا حتى الان فى حكم الوطاويط
وقفت هنا للتأمل
***********
طالعه المراكب عامله سد وحيطه
جابولها مرشد يابنات مش ( تيتا )
قال يعني هو الكتف ناقصه شريطه
الفرن والع يالا شموا شياطها
..........
طالعه المراكب خيمه زحمت خيمه
عدت عليها ملايكه ضل وغيمه
لما السماسره اتفرجت ع السيما
بعتت جيوش النمل ياكل باطها
..........
طالعه المراكب مش راجعه غير بحقوق
جايه ( المحله ) تهني باب اللوق
قصر الخليفه حيبقا ( قصر الشوق )
واللي حيحكم مصر مش وطواطها

**************************
دام الابداع ياعمى عطيه
تحياتى وتقديرى

طالعَة المراكب عـ الميدان بتغنّي

وشراعها من دَمّ الشهيد متحَـنّي

عـ الشَطّ واقف كام غُراب مستنّي

ينعق عليها بجهل.. ويسكّتها

طالعَة المراكب رَغم ريح النوّةْ

بتقول يا ناس الحُكم مش بالقوّةْ

بعتولها واحد..بلطجي وفتُـوّةْ

يفرض عليها القََهر ويموتها

الله الله الله يا هندسة...أبدعت وأمتعت وأوجعت ..

تُثبّت بواسطتي

عرفنا ان الشاعر يكتب القصيده ..
وقل من تكتبه القصيده ..
وانت ياشاعرنا الجميل اصطفاك الحرف ..
لتكن صائغه بماء الذهب ..
وعندما تجد القصيده من يحسن كتابتها ..
تستعديه بقوه كى يطرز هيكلها بقدرته على
التعبير بما تلهمه به القصيده ..
هكذا انت ياشاعرنا المغامر ..
والمقاتل على سطور الرؤيه ..
فملهمتك قاهرتك .. وعندما قهرتك بما فيها
من تداعيات استدعتك وحفزتك وكانت ماشيه المراكب
نص زاجل يحوم حول حمى الوطن ولكنه حمل
الرساله بأمانه التعبير للمتلقى ..
سلمت يداك ولتكن مقاتلا فى محراب اشعارك
بلا ( ذياده ) اسف ( زياده ) فقد قرأتها كذلك
فى قصيدتك والذال لايمكن أن تخرق المراكب
ولكنها تخزى العين حتى لاتحسد ياشاعر ..

زائر

الله الله الله عليك ياأحلى هندسة فى المنتدى
رائعه وراقيه وهادفه وكل مقطع منها تحفه جمياة لوحده
شاعرنا المبدع / م. عطية
مش عارف أختار إيه ولا إيه أعلق عليه
فأنت من الشعراء القليلين اللى بياخدوا الواحد لدنيا تانيه لما بقرأ ليهم
أبدعت واسعدتنى بالنص الجميل اللى زى كرباج على ضهر اللى
مش عاوزين يفوقوا ويفهموا ويحسوا يعنى إيه مصر
تحياتى وخالص ودى وتقديرى

اخى العزيز استاذنا الفاضل بلا منازع الشاعر الرائع المتألق دائما
الاستاذ المهدنس عطيه شواش

تحياتى وتقديرى وشكرا على امتاعنا برائعة من روائع قصائدك الجميلة .
ان اذنت لى ان اقول لك من شدة اعجابى ( ايه ياستاذنا الابداع دا كله دى قصيدة للتعليم نتعلم منها من كل الجوانب ) .

دمت استاذنا بكل خير ومحبة وسعادة ودام ابداعك الرائع .

شاعرنا القدير م. عطية شواش

رائعه من روائعك المعبرة عما يجول فى كل قلب وطنى مصرى
احسنت استاذى ..دام الابداع ونساله سبحانه ان نعبر محتنا بسلام

احترامى ومودتى

كلام جميل يا باشمهندس عطية...

رعاك الله و حفظك الله يا مصر

ياريت كل الناس تعشق مصر زيك
يسلم إبداعك وأدبك

[quote="بهاء الدين محمد"]
لي الشرف بان اكون صاحب اول مرور
علي القصيدة الرائعة
ذات الكلمات المعبرة
دام ابداعك استاذ عطية[/quot
ابني العزيز بهاء اشكرك علي مرورك الطيب دائما انت سباق في تلبيتك ايها المجتهد ..... تحياتي

مجدى سرحان كتب:

شاعرنا المبدع واستاذنا الفاضل عطيه شواش
تحيه طيبه لحضرتك
كلمات رائعه الجمال صادقه الاحساس
حقيقه على الارض نعيشها
استاذى الكريم نعم صدقت ولكننا حتى الان فى حكم الوطاويط
وقفت هنا للتأمل
***********
طالعه المراكب عامله سد وحيطه
جابولها مرشد يابنات مش ( تيتا )
قال يعني هو الكتف ناقصه شريطه
الفرن والع يالا شموا شياطها
..........
طالعه المراكب خيمه زحمت خيمه
عدت عليها ملايكه ضل وغيمه
لما السماسره اتفرجت ع السيما
بعتت جيوش النمل ياكل باطها
..........
طالعه المراكب مش راجعه غير بحقوق
جايه ( المحله ) تهني باب اللوق
قصر الخليفه حيبقا ( قصر الشوق )
واللي حيحكم مصر مش وطواطها

**************************
دام الابداع ياعمى عطيه
تحياتى وتقديرى

حبيبي ياعمده دام المرور الطيب .... تحياتي

رضا محمود كتب:

طالعَة المراكب عـ الميدان بتغنّي

وشراعها من دَمّ الشهيد متحَـنّي

عـ الشَطّ واقف كام غُراب مستنّي

ينعق عليها بجهل.. ويسكّتها

طالعَة المراكب رَغم ريح النوّةْ

بتقول يا ناس الحُكم مش بالقوّةْ

بعتولها واحد..بلطجي وفتُـوّةْ

يفرض عليها القََهر ويموتها

الله الله الله يا هندسة...أبدعت وأمتعت وأوجعت ..

تُثبّت بواسطتي

شاعرنا المتميز والرائع ومشرفنا المحترم الاستاذ رضا محمود اولا اشكرك علي التثبيت واشكرك ايضا علي مرورك الكريم واشكرك علي المداخله الرائعه التي يتضائل شعري بجوارها .... تحياتي

طالعه المراكب سلمولي وبوسو
رافعه العلم ع الصاري مش بتدوسو
رايحه علي بيت الامير حتعوصو
والدم لاحمر مش بعيد سلطها

الله عليك ياباشا مهندس
ايه الجمالى النسجى المتكامل ده Smile

كلام جميل كلام معقول مقدرش اقول حاجة عنه
بالراحة علينا يا عطية راعى اخواتك الصغيرينعلى العموم انت عارف انى باستنى اى حاجة من ناحيتك علشان اقراها تحياتى يا عمنا واحشنى جداااا

السلام عليكم .. كلام من قلبي
شاعرنا القدير .. أ / عطيه شواش
احترامي وتقديري

تعودنا منك دائما علي هذه الروائع
معبرة بصدق عن آلامنا وهمومنا ..
دائما موفق
تقبل مروري

الله ينور ياهندسة
نظم رائع علي وزن البحر السريع
أعجبتني قصيدتك رغم اختلافي مع المضمون
تقبل تحياتي

هايلة هايلة هايلة
صورة بانورامية و إلمام و ثيق بكل تفاصيل المشهد المؤسف , مع إيقاع اللحن الفلكلورى الذى لا ينقطع طوال قراءة القصيدة .
و بالمناسبة أنا من سكان باب اللوق فى مصر (ش يوسف الجندى) , و شطرك الأخير أعاد لأنفى رائحة الغاز , و لعينى حائط العزل و الجرافيتى .
أشكرك على كلماتك التى وضعتنى فى تلك الأجواء و أنا على بعد الاف الأميال
حسن العربى

شاعر واعر ويعرف كيف يبكينا ويضحكنا

فى آن واحد .

هذا هو شاعرنا عطيه شواش .

احييك على حرفك ورؤيتك ونصك الجميل .

مودتى وتحيتى ...

ماأجملك أيها الشاعر السامق
أعدتنى معك إلى زمن الفن الجميل ،
وكأنى أقرأ لعمنا بيرم ..
رائع أنت بكل المعانى ،
تغزل الحروف لحناً تتراقص معه القلوب طرباً وطلباً للمزيد ...
سلمت يمينك ودام إبداعك ...
تقبل مرورى وخالص محبتى وجل تقديرى والورود

أخوكم المحب فى الله
الطبيب الشاعر/ د.محمد رزق
http://elshaereltabib.blogspot.com/

الحكم فعلا مش بالقوة الله عليك يا شاعرنا الكبير تحياتي وسلامي واحترامي

أين أنتم ياأعضاء المنتدى؟

يامن تعلمتم وعلمتم؟

إنه مظهر من مظاهر عدم الوفاء ونكران الجميل لهذا المنتدى العظيم هجركم

له بهذه الطريقة!

في أنتظار معاودة نشاطكم مرة أخرى

أخوكم

طارق منيب

» طالعة المراكب 31