وادى دقنى

عايز عروســـة بعيون ســـــود
خمرية او بيضــــــــة الموجود
بشـــــــــرط تبقى جميلة وعود
مش صـــــــــفرا ومئيحة وتغم


الوزن لو عدى الخمســــــــــين
ان شــــــالله حتى يكون جرامين
ياتسم روحها يا رصـاصــــتين
وأظن أحســــــــــن لها تتسم

وأهم شــــــــــرط ف أول بند
عشان طريقها مايبقاش ســــــد
لايزورها حد ولا تــــــزور حد
غير ربع ســــــاعه ف عيد الام


مصــــــروفها يومى تلاتة جنية
و بيتها وزى ماتمشّـــــــــية
تمشّــــــــى كفتة تمشّى بانية
لعمـــــــرى هنطق ولا أقول بم


ومن شــــــــــــهمتى واخلاقى
هاقفل على الاكـــل الباقــــى
مش بخل انا خايف الاقــــــــى
جنـــــــــابها زى ولاد نمنم


وعشـــان نكون واضحين ف النور
تجيب شــــــــهادة من دكتور
دى عشــرة يابا ماهــوش حنطور
هنلف بية ســــاعتين م الهم

اما عن صحتـــــــــى فامتين
جامد ولكن من ســـــــــنتين
بدءت احس وقـــــــول يامعين
بشـــــــــىء ماظنش انة مهم


قولون صداع زغللة ف الشــوف
ورعشة ســـــــببها مش معروف
مع ضغط ودة غير الغضـــروف
حاجات تـــــــروح بيدوب مرهم


وكلامى لحريمنا المشــــــاهير
ياتقبلونى بــــــــــــــــدون تغير
يا إما هاطلع ع التحــــــــــرير
وادى دقنــــــى لو حلتّها ياعم


__

نص خفيف مرح ساخر

وعنوان مناسب وتعليقي

وادي دقني انا كمان لو لقيت اللي انت عايزها

او حد رضي بيك على وضعك

ودي

الاستاذ / احمد رجب
بشكر حضرتك جدا على كلمتك الجميلة واسعدنى رأيك وياسيدى ادينى بحاول يمكن الاقيها شكرا مرة تانيه وارجو قبول تحياتى

الاستاذ / عادل عوض
انا يااستاذنا ولا زجال ولا شاعر انا انسان بسيط انت بس اللى انسان جميل ومجامل وانا سعيد بكلمتك الرقيقة دى وعندى طلب لو تكرمت انا عايز ادخل العمل دا فى المسابقة ومش عارف اعمل رابط ازاى فلو تكرمت ياريت تساعدنى واكون شاكر لحضرتك جدا تحياتى

استاذنا الشاعر / رضا
امام هذه الكلمه وما تحمله من ثناء ورقة لم يكن امامى الا ان اتوجه اليك بعميق الشكر والامتنان واتوجه بالشكر الى هذا النص لانه عرفنى بشاعر جميل مثل حضرتك ارجو قبول تحياتى

الاستاذ عادل
شكرا لاهتمام حضرتك واتمنى ان اكون عند حسن ظن الجميع
تحياتى

والله يا اخي محمود فكرتني بقصيدة كتبتها اسمها بدي عريس

وانت برضة عايز عروسة تعالي ندور سوا علي واحدة خاطبة

يمكن نلاقي طلبنا

ههههههههههههههههه

تحياتي

اولا بشكرك على قرأتك للقصيدة بس انا معرفتش رايك ايه فى القصيدة أما على الخاطبه فهنروح بعيد ليه انت عايزة عريس وانا عايز عروسة شاورى انتى على اى بيت فى اجدعها قصيدة وانا تحت امرك والشرف ليا طبعا بشكرك مرة تانيه وارجو قبول تحياتى

استاذنا الجميل م/ عطيه شواش
بشكرك جدا على كلمتك ورايك فى القصيدة لانه رأى يهمنى جدا فأنا من أشد المعجبين بقلمك الساحر تحياتى لحضرتك

الشاعر الجميل / طاهر الصوفانى
فعلا هو اللقب عوده وانا متشوق لمعرفه من اين اتيت بهذا اللقب عموما انا سعيد بمعرفه حضرتك جدا وبكلماتك الرقيقة وارجو قبول تحياتى